मुंब्रा : काँग्रेस पक्ष हा म्हातारा झाला असून, त्यांच्याकडील नेतृत्व संपले असल्याने हा पक्ष आता उठणार नसून जुने मुद्दे घेऊनच पक्ष चालला असल्याची टीका समाजवादी पक्षाचे प्रदेशाध्यक्ष तथा आमदार अबू आजमी यांनी बुधवारी रात्री ठाणे जिल्ह्यातील मुस्लीमबहुल मुंब्य्रात झालेल्या पत्रकार परिषदेमध्ये केली.
आमचा पक्ष (समाजवादी) छोटा झाला तरी चालेल. परंतु, आम्ही भाजपला सहन करणार नाही. भाजपला रोखण्यासाठी राज्यात आम्ही समर्थन दिलेले महाविकास आघाडीचे सरकार आमच्या बरोबर अन्याय करीत असून, मोठे राजकीय पक्ष छोट्या राजकीय पक्षांना गिळंकृत करत असल्याचे प्रतिपादनही त्यांनी यावेळी केले. आगामी ठामपाची निवडणूक पक्ष स्वबळावर लढवणार असून, मुंब्रा-कौसा परिसरातील सर्वच्या सर्व १९ प्रभागांतून तसेच ठाणे शहरातून १० प्रभागांमधून पक्ष उमेदवार उभे करणार असल्याची माहितीही त्यांनी यावेळी दिली. पक्ष मजबूत करण्यासाठी वसाहती तसेच घरोघरी जाणार असल्याचेही ते म्हणाले. स्थानिक मतदारांनी जास्तीत जास्त नगरसेवक निवडून दिल्यास हाॅकर्स झोन, शाळा, रुग्णालय आदी स्थानिक मुद्द्यावर काम करणार असल्याचे सूतोवाचही त्यांनी यावेळी केले. पक्षाचे विभागीय अध्यक्ष आदिल खान तसेच इतर पदाधिकारी यावेळी उपस्थित होते.