कल्याण : कल्याण-डोंबिवलीत कोरोना रुग्णांची संख्या वाढत असताना काही मंडळींना आरोग्य आणि सामाजिक भान नसल्याची बाब पुन्हा उघड झाली आहे. कल्याण पूर्वेतील चिंचपाडा गावात एका हळदी समारंभात बैल नाचविण्यात आले. बैलांवर पैशांची उधळणही करण्यात आली. या ठिकाणी सोशल डिस्टन्सिंगचे पालन केले गेले नाही. याबाबत गंभीर दखल महापालिका प्रशासनाकडून घेण्यात आली असून संबंधितांविरोधात गुन्हा दाखल करण्याची प्रक्रिया सुरू आहे.
चिंचपाडा येथे राहणारे प्रकाश म्हात्रे यांच्या मुलाच्या हळदीचा कार्यक्रम आयोजित केला होता. या कार्यक्रमात दोन बैलांना नाचविण्यात आले. त्याठिकाणी डीजेही लावण्यात आला होता. या बैलांवर पैसेही उधळण्यात आले. या कार्यक्रमात सोशल डिस्टन्सिंगचे पालन न करता मोठ्या संख्येने लोक सहभागी झाले होते. हा प्रकार कळताच प्रभाग अधिकारी दीपक शिंदे यांनी पोलीस ठाण्यात संबंधितांविरोधात गुन्हा दाखल करण्याची प्रक्रिया सुरू केली हाेती. कोरोना रोखण्यासाठी राज्यात संचारबंदी लागू करण्यात आली आहे. कल्याण पूर्वेत संचारबंदी असताना एका बारमध्ये मद्यपान करीत असल्याचेही उघड झाले. पोलिसांनी याप्रकरणी २१ जणांविरोधात गुन्हा दाखल केला आहे. तसेच कल्याण पूर्व भागात बाजारही भरला होता. त्यानंतर आज हळदी सभारंभात बैल नाचविण्याचा प्रकार उघडकीस आला. यापूर्वी कोरोनाकाळात डोंबिवलीतील मोठागाव ठाकुर्ली परिसरातील एका तरुणाने बैलाचा वाढदिवस साजरा केल्याप्रकरणी त्याच्याविरोधात गुन्हा दाखल केला होता. त्यानंतर एका माजी नगरसेवकाच्या मुलीच्या लग्नसोहळ्य़ात कोरोना नियमांचे उल्लंघन झाल्याचे उघड झाले होते. कोरोना वाढत असाताना अशा बेजबाबदार घटना घडत असल्याने कल्याण-डोंबिवलीत कोरोनाचे भय लोकप्रतिनिधींसह समान्य नागरिकांनाही राहिले नसल्याचे उघड हाेत आहे.
फोटो-कल्याण-बैल
---------------------