मुंब्रा : शहरातील आनंद कोळीवाडा परिसरात राहणाऱ्या १९ वर्षांच्या तरुणीचा मोबाइल हॅक करून तिला अश्लील फोटो, मेसेज व एमएमएस पाठवून वर्षभर मानसिक त्रास देणाऱ्या जितू केवट (रा. घणसोली, नवी मुंबई) याला मुंब्रा पोलिसांनी सीबीडी - बेलापूर येथून अटक केली. न्यायालयाने त्याला २ ऑगस्टपर्यंत पोलीस कोठडी सुनावली आहे.
तरुणीने त्याच्या व्यतिरिक्त इतर कुणाशी बोलू नये, अशी त्याची इच्छा होती. तिने त्याचे म्हणणे न ऐकल्यास अश्लील व्हिडिओ, फोटोमधील चेहऱ्याच्या ठिकाणी तिचे चेहरा व्हायरल करण्याची तो तिला धमकी देत होता. यामुळे त्रस्त होऊन तिने २ जूनला मुंब्रा पोलीस ठाण्यात त्याच्या विरोधात तक्रार दाखल केली होती. मुंब्रा पोलीस ठाण्याचे पोलीस उपनिरीक्षक गीताराम शेवाळे यांनी ठाणे सायबर सेलच्या मदतीने त्याचा शोध घेऊन त्याला अखेर अटक केली.
-----------