कल्याण : मेल एक्स्प्रेसमध्ये अभिनेत्री अंजिता अधिकारी हिचा मोबाईल हिसकावून पळणाऱ्या चोरट्याला कल्याण रेल्वे पोलिसांनी अटक केली आहे. राजू केंगर (रा. आंबिवली) असे या चोरट्याचे नाव असून, त्याच्याविरोधात यापूर्वी मोबाईल चोरीचे सात गुन्हे दाखल आहेत.
पाटणा एक्स्प्रेसने ४ जूनला मुंबईच्या दिशेने प्रवास करणारी अंजिता ही बोगीच्या दारात उभी राहून मोबाईलवर कुणाशी तरी बोलत होती. गाडी आंबिवली स्थानकादरम्यान पोहोचली असता तिच्या हातावर अनोळखी व्यक्तीने जोराचा झटका मारून तिच्या हातातील मोबाईल हिसकावून पळ काढला. त्या चोरट्याला पकडण्यासाठी धावत्या गाडीतून उतरण्याचा प्रयत्न करणाऱ्या अंजिताला अन्य प्रवाशांनी रोखले. गाडी कल्याण स्थानकात आल्यानंतर तिने याप्रकरणी कल्याण रेल्वे पोलिसात तक्रार दिली.
कल्याण रेल्वे पोलीस ठाण्याचे वरिष्ठ पोलीस निरीक्षक वाल्मिक शार्दुल यांच्या मार्गदर्शनाखाली पोलीस अधिकारी पंढरी कांदे यांनी तपास करून अंजिताचा मोबाईल चोरणाऱ्या केंगर याला अटक केली. त्याच्याकडून तिचा मोबाईलही पोलिसांनी हस्तगत केला आहे.
----------------