सावे येथे सव्वादोन लाखांचा ऐवज लंपास

लक्ष्मी दहिवडी, ता. मंगळवेढा येथील उमेश वसंत पाटील यांचे सावे इमडेवाडी शिवारात घर आहे. शुक्रवारी रात्री १० वाजेच्या सुमारास घरातील सर्वांनी जेवण केले. नंतर सर्व जण झोपी गेले. दरम्यान, शनिवारी पहाटे ५.१५ वाजेच्या सुमारास आई जयश्री पाटील हिने झोपेतून उठल्यावर घरातील सामान अस्ताव्यस्त पडल्याचे पाहून घरात चोरी झाल्याचा संशय व्यक्त केला. त्यांनी दोन्ही मुलांना झोपेतून उठवले. यावेळी उमेश पाटील यांनी त्यांच्या बेडरूममध्ये जाऊन कपाटात ठेवलेले दागिने व पैशांची तपासणी केली असता ते गायब असल्याचे दिसले. चोरट्यांनी कपाटातील रोख ५४ हजार ३०० रुपये आणि सोेने, चांदीचे दागिने, असा सुमारे २ लाख ११ हजार ३३७ रुपये किमतीचा ऐवज चोरून पोबारा केला. याबाबत उमेश वसंत पाटील यांनी अज्ञात चोरट्याविरुद्ध पोलिसांत फिर्याद दाखल केली आहे.