माढा तालुक्यातील उजनी टे. ही गेल्या वीस वर्षांपासून आदर्श ग्रामपंचायत म्हणून जिल्ह्यात ओळखली जाते. संत गाडगेबाबा ग्रामस्वच्छता अभियान विभागीय पुरस्कार तत्कालीन राष्ट्रपती ए.पी.जे. अब्दुल कलाम यांच्या हस्ते दिल्लीत उजनी ग्रामपंचायतीला मिळाला आहे. निर्मलग्राम पुरस्कार मिळाला आहे.
प्रत्येक महिन्यात गावात मासिक सभा बोलाविली जाते, त्याचप्रमाणे २३ जानेवारी रोजी प्रजासत्ताक दिनाच्या पूर्वसंध्येला ग्रामसभा पार पडली. यावेळी सर्वानुमते निर्णय घेण्यात आला. गावाला कोणताही निधी आला की, त्याचा तपशील गावच्या वेशीवर व नोटीस बॉर्डवर लावायचा. त्याप्रमाणे १४व्या वित्त आयोगाच्या निधीतून भविष्यात करावयाची कामे, गावातील विविध विकासकामांची वरिष्ठ कार्यालयाकडे केलेली मागणी, सध्या गावात चालू असलेली विकासकामे, सध्या ग्रामपंचायतीचा झालेला जमाखर्च, गावातील चिंचेच्या झाडाचा करावयाचा लिलाव, गावात करावयाची पथदिव्यांची सुविधा, यासाठी लागणारा निधी आतापर्यंत झालेला खर्च हा सर्व खर्च ग्रामपंचायत नोटीस बोर्डवर व गावच्या वेशीवर लावण्यात आला. या उपक्रमाचे कौतुक होत आहे.
ग्रामसभेला राष्ट्रवादी काँग्रेस माढा विधानसभा अध्यक्ष रमेश पाटील, सरपंच सोनाली मेटे-पाटील, उपसरपंच संगीता पाटील, तंटामुक्ती अध्यक्ष दिलीपराव पाटील, ग्रामपंचायत सदस्य सुशीला पाटील, अनिता माने, कल्याणी गवळी, गणेश बनसोडे, धनाजी मुरकुटे, विठ्ठल मेटे, बाळासाहेब पाटील, सतीश पाटील, पोलीसपाटील संजय गायकवाड, ग्रामसेवक सतीश धायगुडे, संतोष मेटे, मल्हारी गवळी, शुभम माने, नागनाथ बनसोडे आदी उपस्थित होते.
----२७भीमानगर- उजनी टे. ---
उजनी टे. ग्रामपंचायतीच्या वतीने गावातील कामाच्या हिशोबाची यादी नोटीस बोर्डावर लावली आहे. सोबत सदस्यांसह मान्यवर.
----