वीज बिलाच्या थकबाकी वसुलीसाठी वीज वितरणतर्फे मोहीम सुरू आहे. ग्रामीण भागात थकबाकीदार ग्राहकांचे वीज कनेक्शन तोडले जात आहे. या पार्श्वभूमीवर गावोगावी वसुलीसाठी गेलेल्या महावितरण अधिकारी, वायरमन व वीज ग्राहकांत खटके उडत आहेत. नागरिक निम्मे अथवा थोडे कमी बिल भरतो; पण कनेक्शन तोडू नका, अशी विनंती करत आहेत. मात्र, काही अधिकारी ही विनंती धुडकावत वीज कनेक्शन तोडण्याची धमकी देत आहेत. त्यामुळे वादावादी होत आहे.
रविवारी नदीकाठच्या काही गावांत महावितरणचे सहाययक अभियंता, वायरमन गोरगरिबांना धमकावत सक्तीने वीज बिल वसुली करीत असल्याच्या नागरिकांच्या वाढत्या तक्रारी आहेत. हा पोरकटपणा महावितरणच्या अधिकारी व वायरमननी तत्काळ थांबवावा, लोकांच्या भावनांचा उद्रेक होऊ देऊ नये, असा इशारा राजन पाटील यांनी दिला आहे.
जिल्हाधिकाऱ्यांना निवेदन
लॉकडाऊनमुळे सर्व व्यवहार बंद होते. ज्यांचे रोजच्या कमाईवर सर्वकाही अवलंवून असते, अशा लोकांचे हाल झाले. त्यांचे व्यावसायिक, घरगुती लाइटबिल अवाच्या सव्वा आले आहे. अनलॉक झाले तरी अनेकांचे व्यवसाय अजूनही सुरळीत सुरू झालेले नाहीत. मात्र, सर्वसामान्य लोकांकडून बळजबरीने वसुली करण्यात येत आहे. यातून मार्ग काढण्याचे कोणतेही पाऊल आपल्याकडून उचलले गेल्याचे दिसत नाही. सर्वसामान्य जनतेचा विचार कोणीही करताना दिसत नाही, असे राजन पाटील यांनी जिल्हाधिकाऱ्यांना दिलेल्या निवेदनात म्हटले आहे.
कोट :::::::::::::::::::
कोरोनाच्या संकटामुळे अनेक जण आर्थिक अडचणीत आहेत. यामुळे थकबाकीमध्ये नागरिकांना टप्पे पाडून देऊन बिल भरून घेण्याऐवजी अधिकारी, कर्मचारी वीज कनेक्शन तोडण्याची धमकी देत पठाणी वीज बिल वसुली करीत आहेत. अशा महावितरणच्या सहायक अभियंता अधिकाऱ्यावर कारवाई करा.
-अप्पासाहेब देशमुख,
नागरिक ब्रह्मपुरी
कोट ::::::::::::::::::
वरिष्ठ अधिकाऱ्यांचे आमच्यावर वीज बिल वसुलीसाठी मोठे प्रेशर आहे. त्यामुळे आम्हाला वीज बिल न भरणाऱ्यांचे मीटर काढून आणण्याचे सक्त आदेश दिले आहेत.
- भगवान आलदर,
सहायक अभियंता, वीज वितरण