अक्कलकोट : अयोध्येतील श्रीराममंदिर निर्माणाच्या अनुषंगाने सुरू असलेल्या देशव्यापी निधी समर्पण अभियानात आमदार सचिन कल्ल्याणशेट्टी यांनीही १ लाख ५१ हजार रुपयांचा बांधकाम देणगीचा धनादेश देऊन सहभाग नोंदवला. श्री रामजन्मभूमी तीर्थक्षेत्र न्यासाच्या तालुका कार्यकर्त्यांकडे धनादेश सुपूर्द केला.
राष्ट्रपती रामनाथ कोविंद यांच्यापासून १५ जानेवारीपासून या अभियानाचा प्रारंभ झाला. श्री रामजन्मभूमी तीर्थक्षेत्र ट्रस्ट, विश्व हिंदू परिषदेच्या माध्यमातून देशभरात घरोघरी जाऊन निधी संकलनाचे अभियान सुरू आहे. २७ फेब्रुवारीपर्यंत हे देशव्यापी अभियान सुरू राहणार आहे. १२ कोटी कुटुंबांशी संपर्काचे उद्दिष्ट ठेवण्यात आले आहे. सर्वांनी या अभियानात मोठ्या संख्येने सहभागी व्हावे, असे आवाहन आ. कल्याणशेट्टी यांनी केले आहे.
यावेळी निधी संकलन प्रमुख चेतन जाधव, चंद्रकांत जकापुरे, सुशील हिरजकर, तम्मा शेळके, संतोष वगाले, प्रसाद हारकुड, शिवशंकर स्वामी आदी उपस्थित होते.
----
चौकट :-
११३ गावात निधी संकलन सुरू
अक्कलकोट तालुक्यात गावोगावी निधी संकलन सुरू आहे त्याला चांगला प्रतिसाद मिळत आहे. प्रत्येक गावात आठ ते दहा कार्यकर्ते हे काम करत आहेत. या अभियानात सहभागी व्हावे, असे निधी संकलन समितीकडून आवाहन करण्यात आले आहे.