कणकवली : मुसळधार पावसाचा फटका तालुक्यातील फोंडा घाटाला बसला असून, आज, शुक्रवारी सकाळी ६ वाजता या घाटात दरड कोसळली. त्यामुळे या मार्गावरील वाहतूक ठप्प झाली होती. तब्बल अडीच तासांनंतर कोसळलेली दरड हटवून या मार्गावरील वाहतूक सुरळीत करण्यास यश मिळाले. पावसाळ््यात घाटात दरड कोसळण्याची ही जिल्ह्यातील पहिलीच घटना आहे. कोल्हापूर मार्गावर फोंडा घाट बसस्थानकापासून सुमारे साडेनऊ किलोमीटर अंतरावर घाटात आज सकाळी ६ वाजण्याच्या सुमारास दरड कोसळली. या मार्गावरून जाणाऱ्या काही वाहनचालकांनी याबाबतची माहिती पोलीस स्थानकात दिली. तसेच आपत्कालीन व्यवस्थापन कक्षालाही याबाबत कळविण्यात आले. फोंडा घाट येथील हेल्प अकॅडमीच्या कार्यकर्त्यांनी घटनास्थळी दाखल होत दरड हटविण्याचे प्रयत्न सुरू केले होते. सार्वजनिक बांधकाम विभागाने जेसीबीच्या मदतीने या मार्गावरील दरड हटवली. सकाळी ८.३० वाजल्यानंतर या मार्गावरून एकेरी वाहतूक सुरू करण्यात यश आले होते. तत्पूर्वी, या मार्गावरील वाहतूक गगनबावडा घाटमार्गे वळविण्यात आली होती. त्यानंतर काही वेळातच पूर्णत: मार्गावरील दगड दूर करून हा मार्ग वाहतुकीसाठी खुला करण्यात आला. सार्वजनिक बांधकाम विभागाचे उपअभियंता के. कन्नादासन, तहसीलदार समीर घारे यांच्यासह पोलीसही घटनास्थळी दाखल झाले होते. (वार्ताहर)
फोंडा घाटात दरड कोसळून वाहतूक ठप्प
By admin | Updated: July 18, 2014 23:14 IST