सुनील पावरा यांचा घातपात!

ग्रामसेवक मृत्यू प्रकरण : कुटुंबीयांचा आरोप; वरिष्ठ अधिकाऱ्यांवर संशय

मालवण : देवगड तालुक्यातील साळशी-चाफेड येथे ग्रामसेवक म्हणून कार्यरत असलेले सुनील ठोबा पावरा (वय ३२) यांनी आत्महत्या केली नसून, त्यांचा घातपात करण्यात आल्याचा आरोप पावरा कुटुंबीयांनी केला आहे. पंचायत समिती स्तरावरील वरिष्ठ अधिकाऱ्यांच्या त्रासावरून हा प्रकार घडला. सुनील पावरा यांना ठार मारून आत्महत्या केली, असे भासविण्याचा प्रयत्न केला आहे. यामागे तो अधिकारीच जबाबदार आहे, असे सुनील पावरा यांचे वडील ठोबा पावरा यांनी सांगितले आहे. त्यामुळे ग्रामसेवक मृत्यू प्रकरणाला वेगळे वळण लागण्याची शक्यता आहे.दरम्यान, मालवणसह सिंधुदुर्ग जिल्ह्यात सुनील यांच्या मृतदेहाचे शवविच्छेदनास पावरा कुटुंबीयांनी विरोध दर्शविला आहे. पुणे येथील प्रयोगशाळेत शवविच्छेदन व्हावे, अशी मागणी बुधवारी रात्री उशिरापर्यंत पावरा कुटुंबीयांनी कायम धरली होती. साळशी-चाफेड येथून १ डिसेंबरपासून बेपत्ता असलेले ग्रामसेवक सुनील पावरा यांचा सडलेल्या स्थितीतील मृतदेह मंगळवारी सायंकाळी मालवण तालुक्यातील रेवंडी-मधलीवाडी येथील जंगलमय भागात गळफास लावलेल्या स्थितीत आढळून आला होता. मृतदेहाच्या पॅन्टच्या खिशामधून डायरी, काही रोख रक्कम, मोबाईल व चिठ्ठी सापडून आली होती. मालवण पोलीस निरीक्षक शंकर पाटील यांनी मृतदेहाचे वर्णन व मृतदेहाशेजारी उभ्या स्थितीत असलेली मोटारसायकल यावरून सुनील पावरा याने गळफास घेऊन आत्महत्या केल्याची शक्यता व्यक्त केली होती. (प्रतिनिधी)नातेवाइकांनी केली ‘त्या’ जागेची पाहणीसुनील पावरा यांच्या मृत्यूची माहिती मिळताच त्यांचे नातेवाईक बुधवारी सकाळी मालवणमध्ये दाखल झाले. नातेवाइकांनी आपणास जेथे आत्महत्या केली होती ती जागा दाखविण्याची पोलीस प्रशासनास विनंती केली. त्यानंतर नातेवाइकांनी पोलिसांसमवेत दुपारी रेवंडी-मधलीवाडी येथील जंगलमय भागाची पाहणी केली. यात त्यांना तो परिसर संशयास्पद वाटला. आत्महत्या केलेल्या ठिकाणी उंदीर मारण्याचे औषध सापडले. तसेच त्यांचा चष्मा व्यवस्थित दुमडलेल्या स्थितीत होता. झाडावरही लटकलेल्या दोरीचे कोणतेही निशाण नव्हते. देशी दारूची बाटली, थंड पाण्याची बाटली व पाणी ओतलेले भांडे होते. त्यातील पाणीही स्वच्छ होते. यावरून अन्य ठिकाणी सुनील याला मारून त्याचा मृतदेह लटकविण्यात आला. त्यामुळे ही आत्महत्या नसून, घातपातच आहे. जर सुनील याने याठिकाणी आत्महत्या केली असती, तर पन्नास फुटांवर असलेल्या रस्त्यालगत दुर्गंधीचा वास स्थानिकांना आला असता. मात्र, तसा कोणताही प्रकार घडला नाही, असे सुनील यांचा भाऊ यांने सांगितले.पोलिसांनी दिलेली माहिती खोटी!पोलिसांनी सुनील पावरा यांच्या घरच्यांनी मनाविरुद्ध लग्न ठरविल्याच्या रागातून आत्महत्या केली असावी, असा संशय व्यक्त केला होता. मात्र, सुनील यांचा लग्नाला विरोध नव्हताच. पोलिसांनी दिलेली माहिती खोटी आहे. घटनास्थळाचा अंदाज घेता ती आत्महत्या नसून, घातपात असल्याचा आरोप केला.चिठ्ठीत ‘आत्महत्ये’चाच उल्लेखपोलीस निरीक्षक शंकर पाटील यांनी सापडलेली चिठ्ठी बुधवारी सूर्यप्रकाशात धरून पाहिली असल्याचे सांगताना अस्पष्ट झालेल्या मजकुरात स्वत:हून आत्महत्या करीत आहोत, असा मजकूर आहे असे सांगितले. नातेवाइकांची रीतसर तक्रार याबाबची बेपत्ता नोंद ज्या देवगड पोलीस ठाण्यात आहे तेथे ते नोंदवतील. मालवण पोलीस ठाण्यात तक्रार कशी दाखल करणार असे सांगितले. एकूणच नातेवाइकांनी सायंकाळी वा उद्या तक्रार नोंदवू, असे सांगितले आहे.