जानवलीतील अपघातात बालिकेसह सहा जखमी

महामार्गावर जानवली शाळेनजीक तवेरा अपघातग्रस्त

कणकवली : शनिवारी पहाटे महामार्गावर जानवली शाळेनजीक तवेरा अपघातग्रस्त झाली. या अपघातात मुंबईहून मालवणकडे निघालेले सहा प्रवासी जखमी झाले. यात तीन वर्षीय बालिकेचा समावेश आहे. अपघातातील तिघांना कोल्हापूर येथे उपचारासाठी दाखल करण्यात आले आहे. याबाबत वृत्त असे की, चालकाचा ताबा सुटल्याने मुंबईहून मालवणच्या दिशेने जाणारी तवेरा जानवली शाळेनजीक रस्त्याशेजारी झाडाला आपटली. हा अपघात सकाळी ६.३० वाजता घडला. या अपघातात तवेरातील विशाल ठाकूर (वय ३५), वंदना सुरेश महाले (वय ४५), मधुकर राजाराम तेंडुलकर (वय ४५), भारती मधुकर तेंडुलकर (वय ४५), मृण्मयी सुधांशु साकळकर (वय ३) अािण संगीता सुधांशु साकळकर (वय ४२) हे सहाजण जखमी झाले. जखमींना येथील उपजिल्हा रूग्णालयात उपचारासाठी दाखल करण्यात आले. यातील विशाल ठाकूर, वंदना महाले व मधुकर तेंडुलकर या गंभीर जखमींना अधिक उपचारासाठी कोल्हापूर येथे हलविण्यात आले. तीन वर्षीय बालिकेला किरकोळ दुखापत झाली आहे. पोलीस स्थानकात या अपघाताची नोंद नाही. (प्रतिनिधी)