शिरवळ : खंडाळा तालुक्यातील शिरवळ येथील फूलमळा याठिकाणी सिमेंट पोल क्रेनने घेऊन जात असताना २२ के.व्ही. उच्चदाब विद्युत वाहिनीला स्पर्श झाल्याने पोलला धरून जाणाऱ्या खासगी कंत्राटीच्या युवा कामगाराचा उपचारादरम्यान मृत्यू झाला, तर एक गंभीर जखमी झाला आहे.
प्रकाश ऊर्फ बाळू बनाजी भंडलकर (वय २४, रा. काळज, ता. फलटण) असे उपचारादरम्यान मयत झालेल्या कामगाराचे नाव आहे, तर संतोष भरत नागणे असे गंभीर जखमी झालेल्या दुसऱ्या कामगाराचे नाव आहे.
याबाबतची शिरवळ पोलिसांनी दिलेली अधिक माहिती अशी की, शिरवळ येथील फूलमळाजवळ विजेचे पोल खासगी कंत्राटदारामार्फत उभे करण्यात येत होते. यावेळी चार ठिकाणी पोल उभे केल्यानंतर पाचवा पोल उभा करण्याकरिता क्रेनच्या साहाय्याने पोल घेऊन जात असताना पोलला प्रकाश भंडलकर व संतोष नागणे यांनी खालून पकडले होते. यावेळी अचानकपणे सिमेंट पोल घेऊन जात असताना २२ के.व्ही. उच्चदाब विद्युत वाहिनीला स्पर्श झाल्याने विजेचा धक्का बसला. त्यामुळे पोलला धरलेले प्रकाश भंडलकर व संतोष नागणे हे गंभीर जखमी झाले. संबंधितांना तातडीने खासगी रुग्णालयात दाखल केले असता, प्रकाश भंडलकर याचा उपचारादरम्यान मृत्यू झाला.
या घटनेची फिर्याद सुखदेव गाढवे यांनी शिरवळ पोलीस स्टेशनला दिली असून, अधिक तपास पोलीस अंमलदार मदन वरखडे हे करीत आहेत.