काही ठेकेदारांनी भोंदवडे (ता. सातारा) येथे राष्ट्रवादी पक्षाच्या कार्यकर्त्यांचा मेळावा घेतला असल्याचे समजले. त्यासाठीच्या फलकांवर आमची नावे प्रसिध्द केली. मात्र त्या ठेकेदारांनी आम्हाला विचारात न घेता, आम्हाला काहीही कल्पना न देता हा मेळावा घेतला आहे. काही ठेकेदारच जर सगळं काही ठरवणार असतील, तर पक्षही त्यांनीच वाढवावा. आमचा या मेळाव्याशी काहीही संबंध नाही आणि मेळाव्यात आमचा कसलाही सहभाग नाही. त्यामुळे परळी भागातील जनतेने गैरसमज करून घेऊ नये, असे जिल्हा परिषद सदस्या कमल जाधव, पंचायत समितीचे उपसभापती अरविंद जाधव आणि सदस्या विद्या देवरे यांनी स्पष्ट केले आहे. फलकावर आमची नावे असल्याने लोकांचा गैरसमज झाला आहे. वास्तविक या मेळाव्याशी आमचा काहीही संबंध नाही. काही ठेकेदार जर पक्षाच्या कार्यक्रमांशी संबंधित निर्णय घेणार असतील, तर, त्यांनीच पक्षवाढ आणि पुढचं सगळं बघावं.
चौकट
बाबाराजे हाच आमचा पक्ष
कोणत्या पक्षाचा मेळावा आहे आणि तो कोणी घेतलाय याच्याशी आमचा काहीच संबंध नाही. परळी गाव आमदार शिवेंद्रसिंहराजे भोसले यांच्या पाठीशी कायम राहिले आहे आणि पुढेही राहील. आम्ही पक्ष वगैरे मानत नाही तर, बाबाराजे हाच आमचा पक्ष आहे, अशी प्रतिक्रिया परळी गावचे सरपंच बाळकृष्ण जाधव आणि ग्रामस्थांनी दिली.