दुचाकी-ट्रक धडकेत दोन ठार

म्हसवडजवळ अपघात : दुचाकीस्वार वीस फुटांवर फेकला गेला

म्हसवड : येथील पंढरपूर-सातारा रस्त्यावरील पंतवस्तीजवळ दुचाकी आणि ट्रक यांच्यात समोरासमोर धडक झाली. या अपघातात दुचाकीवरील हणमंत लक्ष्मण गळवे (वय २७, रा. गळवेवाडी, ता. आटपाडी, जि. सांगली) व धनंजय शामराव कर्चे (रा. आटफाडा, ता. बारामती) या दोघांचा जागीच मृत्यू झाला. अपघातानंतर ट्रकचालकाने पलायन केले. पोलिसांच्या माहितीनुसार, हणमंत गळवे व धनंजय कर्चे हे दोघे मेहुणे दुचाकीवरून (एमएच ४२ एडी ८०९७) साताऱ्याच्या दिशेने निघाले होते. ते येथील पंतवस्तीजवळ आले असता पंढरपूरच्या दिशेने भरधाव निघालेल्या ट्रकची (एमएच १३ एक्स ४४५६) दुचाकीला जोरदार धडक बसली. यामध्ये दुचाकीस्वार हणमंत गळवे यांचा जागीच मृत्यू झाला, तर पाठीमागे बसलेले धनंजय कर्चे हे सुमारे वीस फुटांवर फेकले गेले. यामध्ये त्यांचाही जागीच मृत्यू झाला. शेतात काम करणाऱ्या महिलांनी आरडाओरडा केल्याने चालकाने ट्रक जाग्यावरच सोडून पलायन केले. त्यावेळी माजी नगरसेवक युवराज सूर्यवंशी, दुर्गेश शिंदे, रोहित सूर्यवंशी, पप्पू लोखंडे, पाडुरंग पवार, पांडुरंग सावंत यांनी घटनास्थळी धाव घेतली. त्यानंतर मृतांच्या नातेवाइकांशी संपर्क साधून घटनेची माहिती देत मृतदेह म्हसवड आरोग्य केंद्रात नेण्यास मदत केली. अपघाताची नोंद म्हसवड पोलीस ठाण्यात झाली आहे. (प्रतिनिधी)