लोणंद : थोपटेवाडी, ता. पुरंदर येथील पेट्रोल पंपावर दुचाकीमध्ये पेट्रोल भरून पैसा न देताच लोणंदकडे पोबारा केला. त्यामुळे संबंधित व्यक्तीचा पाठलाग करून त्यास पकडले असता त्याच्याकडे गावठी कट्टा, दोन जिवंत काडतुसे, चाकू तसेच चोरीची दुचाकी हस्तगत करण्यात आली. गणेश सुभाष चव्हाण (वय २९, रा. बेगमपूर, ता. मोहोळ, जि. सोलापूर) असे ताब्यात घेतलेल्या व्यक्तीचे नाव आहे.
याबाबत पोलिसांनी दिलेली माहिती अशी की, पुरंदर तालुक्यातील थोपटेवाडी येथील नम्रता पेट्रोल पंपावर गुरुवार, दि. १ रोजी दुपारी दोनच्या सुमारास गणेश चव्हाण याने दुचाकीमध्ये (एमएच १२ केजी ३८२३) पेट्रोल भरले. मात्र पैसा न देताच त्या ठिकाणाहून लोणंदच्या दिशेने निघून गेला. पंपावरील कर्मचाऱ्यांनी नीरा ते लोणंद पाठलाग करून त्यास जुना फलटण रोड येथे लोणंद पोलिसांच्या ताब्यात दिले.
लोणंद पोलिसांनी त्याची कसून चौकशी व अंगझडती घेतली असता त्याच्याकडे एक गावठी बनावटीचा कट्टा, दोन जिवंत काडतुसे, एक चाकू आढळून आला. त्याच्याकडे असणारी दुचाकीही त्याने पुणे येथून चोरल्याचे निष्पन्न झाले. लोणंदचे सहायक पोलीस निरीक्षक विशाल वायकर, पोलीस हवालदार गार्डे करीत आहेत.
चौकट
पंप मालकाच्या मुलाच्या मित्रांनी लोणंद येथील रेल्वे पुलावर पकडण्याचा प्रयत्न केला, मात्र तिथूनही चौघांना गुंगारा देऊन तो निसटला. पुन्हा त्याचा पाठलाग करून जुना फलटण रोड, डॉ. बुटीयानी हॉस्पिटलसमोर आरोपीस पकडून पोलिसांच्या हवाली केल्याने त्याचे गुन्हे उघड करण्यात पोलिसांना यश आले.