सातारा : पुणे-बेंगलोर राष्ट्रीय महामार्गावर येथील बाॅम्बे रेस्टाॅरंट परिसरामध्ये ट्रकला पाठीमागून टेम्पोची धडक बसल्याने टेम्पो चालकाचा जागीच मृत्यू झाला. हा अपघात मंगळवारी पहाटे पाचच्या सुमारास झाला.
अमित तानाजी सुर्वे (वय ३०, रा. डांगरेघर, पो. केळघर, ता. जावळी) असे अपघातात ठार झालेल्या टेम्पो चालकाचे नाव आहे. याबाबत पोलिसांनी दिलेली माहिती अशी, आयशर टेम्पो (एमएच ४३ बीएक्स ७२७१)
पुण्याहून कोल्हापूरकडे निघाला होता. तर या टेम्पोच्या पुढे असणारा एक ट्रकही कोल्हापूरकडे निघाला होता. बाॅम्बे रेस्टाॅरंट परिसरात आल्यानंतर टेम्पो चालकाचे नियंत्रण सुटले. त्यामुळे टेम्पोची ट्रकला पाठीमागून भीषण धडक बसली. यात टेम्पो चालक अमित सुर्वे हा जागीच ठार झाला. हा अपघात इतका भीषण होता की, चालकाचा मृतदेह क्रेनच्या साह्याने बाहेर काढण्यात आला. टेम्पोमध्ये असलेला त्याचा सहकारी अमोल सुर्वे हासुद्धा जखमी झाला. या अपघातानंतर सातारा शहर पोलीस ठाण्याचे हवालदार संजू गुसिंगे यांनी घटनास्थळी धाव घेतली. जखमीला रुग्णालयात पाठविल्यानंतर त्यांनी महामार्गावरील वाहतूक पूर्ववत केली.