खंडाळा : खंडाळा तालुक्यातील ५० ग्रामपंचायतींच्या सार्वत्रिक निवडणुकांसाठी शुक्रवार, १५ जानेवारी रोजी मतदान पार पडणार आहे. त्यासाठी तालुका प्रशासनाची तयारी पूर्ण झाली आहे. मतदान केंद्रावरील अधिकारी, कर्मचारी अशा १०२३ जणांची टीम सज्ज आहे. कोरोनाकाळात काळजी घेऊन मतदान शांततेत पार पाडावे, असे आवाहन तहसीलदार दशरथ काळे यांनी केले आहे.
खंडाळा तालुक्यातील ५० ग्रामपंचायतींच्या निवडणुका होत आहेत. सात ग्रामपंचायत बिनविरोध झाल्या आहेत. तर यामध्ये ४६१ जागांपैकी ३२० जागांवर मतदान होणार आहे. ६९८ उमेदवार निवडणूक रिंगणात आहेत. यासाठीची संपूर्ण यंत्रणा तालुक्यातील १३८ मतदान केंद्रांवर रवाना झाले आहेत. या प्रक्रियेसाठी उपजिल्हाधिकारी, तहसीलदार, नायब तहसीलदार, सात झोनल अधिकारी, २१ निवडणूक निर्णय अधिकारी व ४२ सहायक अधिकारी व मतदान अधिकारी कामकाज पाहत आहेत.
दरम्यान, गुरुवारी मतदान केंद्रावर साहित्य पाठविण्यासाठी पंचायत समिती प्रांगणात मंडप उभारून गावनिहाय टेबल लावण्यात आले होते. या टेबलवर मतदान केंद्रस्तरीय अधिकाऱ्यांना मतदान यंत्रासह मतदानाचे सर्व साहित्य वाटप करण्यात आले. शुक्रवारी सायंकाळी मतदानप्रक्रिया पूर्ण झाल्यानंतर त्यांच्या टेबलावर मतदान यंत्र साहित्य जमा करायचे आहे, अशी व्यवस्था तहसील प्रशासनाकडून करण्यात आली आहे.
मतदानप्रक्रिया शांततेत पार पाडण्यासाठी पोलीस प्रशासनाकडून मतदानाच्या दिवशी चोख पोलीस बंदोबस्त ठेवण्यात आला आहे. शुक्रवारी मतदान झाल्यानंतर १८ जानेवारी रोजी मतमोजणी करण्यात येणार आहे. या पार्श्वभूमीवर खंडाळा शिरवळ व लोणंद पोलीस ठाण्यातील सर्व अधिकारी, १७० पोलीस कर्मचारी व होमगार्डची नियुक्ती करण्यात आली. तर मतदान यंत्रणा ठेवण्यासाठी स्ट्राँग रुमसाठी एसआरपीएफचे जवान व पोलीस फौजफाटा तैनात राहणार आहे.