कऱ्हाड : कऱ्हाड येथे उपविभागीय पोलीस अधिकारी म्हणून काम केलेल्या व सध्या ठाणे जिल्ह्यातील शहापूरचे उपविभागीय पोलीस अधीक्षक नवनाथ ढवळे यांना ‘राष्ट्रपती शौर्य पदक’ जाहीर झाले आहे. गडचिरोली जिल्ह्यातील नक्षलवाद्यांच्या विरोधात केलेल्या कामगिरीबद्दल हा सन्मान करण्यात आला आहे.
नवनाथ ढवळे यांनी २०१५-१७ याकाळात गडचिरोली जिल्हा पोलीस दलात ऑपरेशन उपविभागीय पोलीस अधीक्षक म्हणून कार्यरत होते. याकाळात त्यांनी नक्षलवाद्यांविरोधात अनेक मोहिमा यशस्वी केल्या. त्यातील मे २०१६मध्ये धानोरा उपविभागातील चातगाव पोलीस मदत केंद्राच्या हद्दीतील हुर्रेकसा जंगल परिसरात नवनाथ ढवळे व त्यांच्या टीमने कुप्रसिद्ध नक्षली रजिता उसेंडी हिचा खत्मा केला. उसेंडी हिच्यावर १३९ गुन्हे दाखल होते. तिला पकडण्यासाठी १६ लाखांचे बक्षीस ठेवण्यात आले होते.
ही चकमक तब्बल १२ तास सुरु होती. ढवळे आणि त्यांच्या सहकाऱ्यांनी जीवाची बाजी लावत ही कामगिरी केली होती. या कामगिरीची दखल घेऊन त्यांना ‘राष्ट्रपती शौर्य पदक’ जाहीर झाले आहे.
मूळ अहमदनगर जिल्ह्यातील वडजिरे या गावातील असलेल्या नवनाथ ढवळे यांनी गडचिरोली, कऱ्हाड, चिपळूण याठिकाणी उपविभागीय पोलीस अधिकारी म्हणून उल्लेखनीय कामगिरी केली आहे. ते सध्या ठाणे जिल्ह्यातील शहापूरचे उपविभागीय पोलीस अधीक्षक म्हणून काम करत आहेत. कोरोना काळात त्यांनी केलेले कामही लक्ष्यवेधी ठरले आहे.
फोटो