सातारा : एका आठ वर्षे वयाच्या मुलीवर अतिप्रसंग करण्याचा प्रयत्न करून तिला चालत्या रेल्वेतून ढकलून दिल्याचा धक्कादायक प्रकार आदर्की ते वाठार स्टेशन दरम्यान सोमवारी मध्यरात्री दीड वाजता घडला. यामध्ये मुलगी जखमी झाली आहे. संशयितास रेल्वे पोलिसांनी भुसावळ येथून अटक केली असून प्रभु मल्लाप्पा उपहार (वय ३३, रा. संगळ पो. सुमधूर, जि. बेळगाव, कर्नाटक) असे संशयिताचे नाव आहे. आरोपी हा सैन्यदलात झांसी येथे कार्यरत आहे.
याबाबत रेल्वे पोलिसांनी दिलेली अधिक माहिती अशी, गोवा-निजामुद्दीन एक्स्प्रेस गोव्यावरून सुटल्यानंतर मंगळवारी रात्री दीड वाजता साताऱ्यापासून पुढे लोणंदला गेली. या रेल्वेच्या एस-७ डब्यात एक कुटुंब प्रवास करत होते. रात्री जेवण झाल्यानंतर मुलगी बर्थवर झोपली होती. संशयिताने मुलीस झोपेतच उचलून बाथरुममध्ये नेले. बाथरुमध्ये तिच्यावर अतिप्रसंग करण्याचा प्रयत्न करत असतानाच मुलीस जाग आली. तिने आरडाओरडा सुरू केला. तिने आरोपीला लाथा मारल्या. लाथा मारल्यानंतर आरोपीने मुलीस रडू नको, आई-वडिलांकडे सोडतो, असे सांगितले व तिला बाथरुमच्या बाहेर घेऊन आला. यानंतर संशयिताने अचानक दरवाजा उघडून मुलीस ट्रेनच्या बाहेर फेकून दिले. याचवेळी रेल्वेने आदर्की स्टेशन ओलांडून घाटरस्ता सुरू झाला होता. यामुळे ट्रेनचा वेग ताशी २० किमी इतका कमी होता. त्यामुळे मुलगी ट्रेनमधून पडली तरी तिला गंभीर इजा झाली नाही. मुलगी पायावर पडल्याने तिचा पाय फ्रॅक्चर झाला. तसेच तिच्या हनुवटी व हाताला जखमा झाल्या. ती तेथे पडल्याचे सकाळी गावातील स्थानिक लोकांच्या निदर्शनास आले. संबंधितांनी तिच्यावर उपचार करण्याचे प्रयत्न केले. जेव्हा तिला रुग्णालयात दाखल केले तेव्हा तिने खरी हकीकत सांगितली. तेव्हा ही घटना धावत्या रेल्वेच्या डब्यात घडली असल्याचे समोर आले. ही माहिती मिळताच रेल्वे पोलिसांनी तातडीने हालचाल केली. महाराष्ट्र राज्य लोहमार्गच्या अप्पर पोलीस महासंचालक डॉ. प्रज्ञा सरवदे, पोलीस अधीक्षक सदानंद वायसे पाटील यांनी रेल्वेच्या बोगी पूर्णपणे ब्लॉक करण्याचे आदेश दिले. जेणेकरून आरोपी पळून जाऊ नये. त्यानुसार रेल्वेेचे सर्व डबे ब्लॉक करण्यात आले. दरम्यान, लोणंदपासून जळगाव-भुसावळपर्यंत ट्रेनमध्ये प्रत्येक रेल्वे स्टेशनवर एकूण ३०० ते ४०० पोलीस कॉन्स्टेबल तसेच रेल्वे कर्मचारी चढवले गेले. मुलीने दिलेल्या वर्णनानुसार जवळपास २५ व्यक्तींची पोलिसांकडून पडताळणी करण्यात आली. त्यातून चारजणांना ताब्यात घेतले. या चौघातून मूळ संशयिताची ओळख पटली. त्याची चौकशी केली असता त्याने केलेल्या कृत्याची पोलिसी खाक्या दाखवताच कबुली दिली. त्याचा फोटो व्हॉटसॲपवरून सातारा येथे पोलिसांना पाठवला. तो फोटो पीडित मुलीस दाखवला असता मुलीने संशयितास ओळखताच संबंधितास पोलिसांनी भुसावळ येथे अटक केली.
संशयित आरोपी प्रभू उपहार हा सैन्यदलामध्ये नाईक या पदावर काम करतोय. त्याने केलेल्या या घृणास्पद प्रकाराने समाजमन हेलावून गेले आहे. कडक कारवाई करावी अशीही मागणी करण्यात आली आहे.
चौकट: रेल्वे अधिकाऱ्यांची रुग्णालयात धाव
रेल्वेच्या अधिकाऱ्यांनी जिल्हा शासकीय रुग्णालयात येऊन जखमी मुलीची विचारपूस केली. सेेेंट्रल रेल्वेचे पोलीस दलाचा रेल्वे प्रोटेक्शन फोर्सचे पोलीस तसेच टीसी या डब्यात हजर असणे गरजेचे होते. तथापि, भविष्यात याबाबत योग्य ती अंमलबजावणी करणार असल्याचेही रेल्वेच्या पोलीस अधिकाऱ्यांनी यावेळी सांगितले.