शिवथर : आरफळ (ता. सातारा) येथे ग्रामपंचायतीच्यावतीने जिल्हा परिषदेच्या प्राथमिक शाळेत विलगीकरण कक्षाचे उद्घाटन सरपंच मेघा माने यांच्या हस्ते करण्यात आले.
तहसीलदार आशा होळकर यांनी दिलेल्या सूचनेनुसार आरफळ ग्रामपंचायत व ग्रामस्थांनी आदर्श घडवित गावातील नागरिकांच्या आरोग्यासाठी तसेच होम आयसोलेशनमध्ये येणाऱ्या अडचणीवर मात करण्यासाठी ग्रामस्थ व ग्रामपंचायतीच्या स्वनिधीतून गावातील जिल्हा परिषदेच्या शाळेमध्ये दहा बेडच्या विलगीकरण कक्षाचे उद्घाटन मंगळवारी करण्यात आले. या सेंटरमध्ये सौम्य लक्षणे असणाऱ्या रुग्णांचे विलगीकरण केले जाणार आहे. या कक्षाला तहसीलदार यांनी भेट देऊन कामाचे कौतुक केले. या उद्घाटनप्रसंगी ग्रामविकास अधिकारी दादासाहेब बनकर, तलाठी पिसे, उपसरपंच सुनील पवार, ग्रामपंचायत सदस्य वैभव पवार, अश्विन पवार, सागर पवार, निलेश साबळे तसेच गावातील ग्रामस्थ उपस्थित होते.