दहा हजार घेऊन चाललाय शोध मालकाचा

एटीएम सेंटरमध्ये दहा हजार रुपये आढळून आले.

औंध : औंध येथील होमगार्डमध्ये कार्यरत असणाऱ्या ३० वर्षीय विजय सुरेश गोसावी या युवकास शनिवारी १० हजार रुपये सापडले असून ते घेऊन जाण्याचे आवाहन करण्यात आले आहे. याबाबतची अधिक माहिती अशी की शनिवार दुपारी साडेबाराच्या सुमारास विजय गोसावी हे होमगार्डमध्ये असल्याने औंध पोलीस स्टेशनमध्ये आपले कर्तव्य बजवित होते. पोलीसांना बंदोबस्तामध्ये मदत केल्यानंर ते पोलीस स्टेशन लगतच्या एटीएम सेंटर जवळून जात असताना त्यांना एटीएम सेंटरमध्ये दहा हजार रुपये आढळून आले. त्यानंतर त्यांची बराचवेळ वाट पाहिली मात्र, ते पैसे नेण्यासाठी कोणीच न आल्याने त्यांनी ते आपल्या जवळ ठेवले आहेत. त्यानंतर रविवारी औंधमधील काही नागरिकांच्या कानावर ही बाब त्यांनी घातली व हे पैसे ज्याचे असतील त्यास परत करण्याची प्रामाणिक तळमळ व्यक्त केली. त्यानंतर ग्रामस्थांनी स्टेट बँकेच्या अधिकाऱ्यांशी संपर्क साधून माहिती घेतली असता त्या दरम्यानच्या कालावधीत जे व्यवहार झाले ते पाहून ते पैसे योग्य व्यक्तीपर्यंत पोहचवता येतील असे सांगितले. तरी ही हे पैसे ज्या व्यक्तीचे असतील त्यांनी ओळख पटवून शहानिशा करण्यासाठी विजय गोसावी यांच्याशी संपर्क साधावा. असे आवाहन करण्यात आले असून त्यांच्या प्रामाणिकपणाचे औंध ग्रामस्थ, पोलीस विभाग, होमगार्ड विभागाकडून कौतुक केले जात आहे. (वार्ताहर)