फलटण : कोरोना लसीकरणासाठी फलटण तालुका सज्ज झाला असून, शनिवार, दिनांक १६ जानेवारी रोजी फलटण तालुक्यामध्ये दोन ठिकाणी पहिल्या टप्प्यात लसीकरण सत्र आयोजित करण्यात आलेले आहे, अशी माहिती तालुका आरोग्य अधिकारी आर. एम. जगदाळे यांनी दिली आहे.
फलटण शहरात नागरी प्राथमिक आरोग्य केंद्र, शंकर मार्केट (जुनी मंडई) फलटण व प्राथमिक आरोग्य केंद्र, तरडगाव (ता. फलटण) येथे पहिल्या टप्प्यामध्ये लसीकरणाची सुरुवात करण्यात येणार आहे.
उपविभागीय अधिकारी शिवाजीराव जगताप व तहसीलदार समीर यादव यांच्या मार्गदर्शनाखाली फलटण तालुक्यात लसीकरणाचा पहिला टप्पा सुरू होत आहे. पहिल्या टप्प्यातील लसीकरण सत्रामध्ये सर्व शासकीय आरोग्य स्वयंसेविका, अंगणवाडी सेविका, खासगी वैद्यकीय व्यावसायिक कर्मचारी, आशा व त्यांच्या दवाखान्यांमध्ये काम करणारे कर्मचारी यांची कोव्हीन अॅपमध्ये नोंदणी केली आहे. कोरोना लसीकरण दोन डोसमध्ये देण्यात येणार आहे. लसीकरणाचे दोन डोसमधील अंतर चार आठवड्यांचे असेल. दहा दिवसांमध्ये सर्व शासकीय आरोग्य कर्मचारी, खासगी वैद्यकीय व्यावसायिक व त्यांचे कर्मचारी यांचे लसीकरण करून पहिला डोस पूर्ण करण्यात येणार आहे.
यानंतर पोलीस कर्मचारी व फ्रंट लाईन कर्मचारी यांना जवळच्या प्राथमिक आरोग्य केंद्र व नागरी आरोग्य केंद्रात कोरोना लसीकरण करण्यात येणार आहे. त्यासाठी त्यांनी कोव्हीन अॅपमध्ये वैयक्तिक माहिती भरणे गरजेचे आहे. तसेच फोटो ओळखपत्रासह जवळच्या आरोग्य केंद्रामध्ये जाऊन नोंदणी करून घेणे आवश्यक आहे. नोंदणी केल्यानंतर लसीकरणाच्या एक दिवस अगोदर संबंधितांना लसीकरणाची तारीख, ठिकाण, वेळ याचा संदेश रजिस्टर केलेल्या मोबाईलवर उपलब्ध होणार आहे.