पुसेगाव : रब्बी हंगामात कांद्याची लागवड करण्यासाठी शेतकऱ्यांनी पंधरा-वीस दिवसांपूर्वी आपल्या शेतात कांदा रोप (तराव) निर्मितीसाठी कांद्याचे बी टाकले. यापासून रोपे उगवून आली असली, तरी मूळकुज व बुरशीमुळे ती रोपे जळून जात असल्याने पुसेगावसह परिसरातील शेतकरी हतबल झाले आहेत.
खरिपाची सुगी झाल्यानंतर मोकळ्या शेतात कांदा लागवड करण्याकडे शेतकऱ्यांचा कल असतो. गेल्यावर्षीच्या कांद्याला चांगला दर मिळाल्याने यंदाही शेतकरी कांदा लागवडीवर भर देत आहेत. काही शेतकऱ्यांनी स्वत:चे कांदा बी, तर काही जणांनी बी विकत आणून त्यापासून कांदा रोपे तयार करण्यास सुरुवात केली आहे. सध्या एक किलो कांद्याच्या बीचा भाव चार ते पाच हजार रुपये आहे, तर एक एकर कांद्याची लागवड करण्यासाठी सुमारे साडेतीन ते चार किलो बी टाकणे गरजेचे असते. शेतकऱ्यांनी खरीप हंगामातील पिके काढणीला येताच कांद्याची रोपे (तराव) टाकली आहेत. मात्र, सततच पाऊस व खराब हवामानामुळे रोपे मूळकुज व बुरशी रोगामुळे जागेवरच जळून जात आहेत.
रोपांवर औषधांची फवारणी करूनदेखील तराव जळून जात असून, चार किलो बीच्या तरावात १० ते १५ गुंठे क्षेत्रावर कांदा लागण होत आहे. एवढे कष्ट घेऊनही शेतात टाकलेले तराव तरत नसल्याने शेतकरी चिंताग्रस्त झाला आहे.
(चौकट)
तरीही दराची शाश्वती नाही..
एक एकर कांदा लावणी करण्यासाठी शेतमजूर आठ ते नऊ हजार रुपये घेत आहेत. पुढे खते, औषधे, अंतर्गत मशागतीचा प्रचंड खर्च शेतकऱ्यांना सहन करावा लागतो. म्हणजे शेतकऱ्यांने एकरी सुमारे ५० ते ६० हजार रुपये खर्चून उत्पादित केलेल्या कांद्याच्या पिकाच्या दराची शाश्वती नसते. त्यामुळे शेतकरी वगार्तून कांदा पिकाबाबत चिंता वाढू लागली आहे.
(कोट)
गेल्या काही दिवसांपासून कांद्याच्या तरावाला पोषक वातावरण मिळत नसल्याने रोपे जागेवरच जळून जात आहेत. रोपाला लागवडी योग्य करण्यासाठी शेतकऱ्यांना आर्थिक त्रासाबरोबर कष्ट घ्यावे लागत आहेत. कांद्यासाठी ठेवलेले क्षेत्र स्वत:च्या तरावाने पूर्ण होत नसल्याने इतर ठिकाणांहून कांद्याचे तराव आणावे लागत आहे. मात्र, त्याचा दर शेतकऱ्यांना परवडणारा नाही.
- अविनाश रणसिंग, रणसिंगवाडी
फोटो : २० पुसेगाव
पुसेगाव येथे कांद्याच्या तरावाचा बुरशी व मूळकुज रोगापासून बचाव करण्यासाठी शेतकरी रोपांवर औषध फवारणी करीत आहेत. (छाया : केशव जाधव)