आॅनलाइन लोकमत
सातारा, दि. 09 - सोशल मीडियावरून विनयभंग केल्या प्रकरणात आमदार जयकुमार गोरे यांचा अटकपूर्व जामीन जिल्हा न्यायालयापाठोपाठ सोमवारी उच्च न्यायालयानेही फेटाळला. दरम्यान, सर्वोच्च न्यायालयात अपील करेपर्यंत अटकेला मुदत मिळण्यासाठी केलेला अर्जही न्यायमूर्ती साधना जाधव यांनी फेटाळल्यामुळे जयकुमार गोरे यांना कोणत्याही क्षणी अटक होऊ शकते.
सातारा येथील एका विवाहित महिलेच्या मोबाईलवर जयकुमार गोरे यांनी व्हॉट्सअॅपच्या माध्यमातून अश्लील संदेश पाठविल्याप्रकरणी सातारा शहर पोलिस ठाण्यात विनयभंगाचा गुन्हा दाखल करण्यात आला होता. त्यानंतर जयकुमार गोरे यांच्या अटकपूर्व जामिनासाठी अॅड. डी. व्ही. पाटील यांनी अर्ज केला होता. जयकुमार गोरे यांच्या वतीने अॅड. धैर्यशील पाटील यांनी युक्तिवाद केला. त्यात फिर्यादीकडूनही मेसेज पाठवण्यात आल्याचे त्यांनी न्यायालयाला सांगितले. आपण कुठल्याही मोबाईलवरून मेसेज पाठवले नसल्याचे शपथपत्र फिर्यादीच्या वतीने न्यायालयात दाखल केले. यावेळी दोन्ही बाजूंचे युक्तिवाद ऐकून जिल्हा व सत्र न्यायालयाचे प्रथम वर्ग न्यायाधीश व्ही. एम. मोहिते यांनी आमदार गोरे यांचा जामीन अर्ज फेटाळल्याचा निर्णय दिला.
त्यानंतर या निर्णयावर अॅड. पाटील यांनी उच्च न्यायालयात जाण्यासाठी आवश्यक मुदत हवी असल्याचा विनंती अर्ज केला. तोपर्यंत आ. गोरे यांना अटक न करण्याचे आदेश पोलिस प्रशासनास द्यावेत, अशी मागणीही केली होती. यावेळीही दोन्ही बाजूंने विविध खटल्यातील निकाल युक्तिवाद म्हणून सादर केले गेले. त्यावर न्यायाधीश मोहिते यांनी ‘निर्णय होत नाही, तोपर्यंत आमदार गोरे यांना पोलिसांनी अटक करू नये,’ असे निर्देश दिले. त्यानंतर आमदार गोरे यांना उच्च न्यायालयात जामीन मिळविण्यासाठी जाण्यास मुदत दिली होती. आ. गोरे यांनी उच्च न्यायालयात जामिनासाठी अर्ज केला होता, तो अर्ज सोमवारी फेटाळण्यात आला.