कऱ्हाड : शहरातील मुख्य चौकासह अंतर्गत पेठेतील नाल्यांमध्ये प्लास्टिक कचऱ्याचे प्रमाण वाढले आहे. गत काही दिवसांपासून प्लास्टिक कचरा गटरमध्ये तसाच साचून राहत आहे. याचा त्रास परिसरातील नागरिकांना सहन करावा लागत आहे. स्वच्छता कर्मचारी कचरा हटवितात. मात्र, काही दिवसांत कचऱ्याचे प्रमाण वाढते. या कचऱ्यामुळे दुर्गंधी वाढत आहे.
रस्त्यावर खड्डे
पाटण : तारळे-घोट रस्त्यावर कदम हॉस्पिटलपर्यंत रस्त्यावर खड्डयांमुळे चाळण निर्माण झाली आहे. सुमारे एक ते दीड फूट खोलीच्या या खड्ड्यातून वाट काढताना वाहनचालकांना कसरत करावी लागत आहे, तर प्रवाशांना जीव मुठीत घेऊन प्रवास करावा लागत आहे. बांधकाम विभागाकडून रस्त्याच्या डागडुजीची मागणी केली जात आहे.
बिबट्याची दहशत (फोटो : १४इन्फोबॉक्स०२)
तांबवे : परिसरातील शिवारामध्ये सध्या बिबट्याची दहशत आहे. ग्रामस्थांना काही दिवसांपूर्वी बिबट्याचे दर्शन झाले होते, तसेच नजीकच्या शिवारातही बिबट्याने शेतकऱ्याला दर्शन दिले. त्यामुळे शिवारात जाण्यास शेतकरी घाबरत आहेत. विभागातील अनेक गावांमध्ये वारंवार बिबट्या आढळून येत आहे. तसेच पाळीव जनावरांवरही त्याच्याकडून हल्ले होत आहेत.
झुडपे विस्तारली
तांबवे : उत्तर तांबवे ते आरेवाडी दरम्यान रस्त्याकडेला अनेक ठिकाणी झाडवेली वाढली आहेत. त्यामुळे ती अपघातास निमंत्रण देणारी ठरू लागली आहेत. उत्तर तांबवेतून आरेवाडी, गमेवाडी, डेळेवाडीला जाण्यास रस्ता आहे. या रस्त्यानजीक झुडपे वाढली आहेत. ही झुडपे हटविण्याची मागणी वाहनधारकांकडून होत आहे.