दरम्यान, खंडोबा-म्हाळसा यांच्या लग्न सोहळ्यासाठी येणारे मानकरी तसेच लग्नसोहळ्यासाठी निघणारी मिरवणूक यांना जिल्हा प्रशासनाने परवानगी द्यावी, अशी मागणी देवस्थानचे प्रमुख मानकरी देवराज पाटील यांनी यावेळी केली. खंडोबा देवाची यात्रा २५ जानेवारी रोजी संपन्न होत आहे. कोरोनाच्या पार्श्वभूमीवर यावर्षी राज्यातील बहुतांशी यात्रा रद्द करण्यात आल्या आहेत. याच अनुषंगाने पाल येथे यात्रा पूर्व नियोजन बैठक घेऊन सदरचा निर्णय जाहीर करण्यात आला. बैठकीच्या अध्यक्षस्थानी देवस्थानचे प्रमुख मानकरी देवराज पाटील होते, तर पोलीस उपअधीक्षक डॉ. रणजित पाटील, गटविकास अधिकारी आबासाहेब पवार, जिल्हा आरोग्य अधिकारी डॉ. सचिन पाटील, उंब्रज पोलीस ठाण्याचे सहायक पोलीस निरीक्षक अजय गोरड, देवस्थानचे संचालक संजय काळभोर, बाबासाहेब शेळके, मंगेश कुंभार, संजय गोरे, सचिन लवंदे यांच्यासह ग्रामस्थ उपस्थित होते.
यात्रा कमीत कमी भाविकांच्या उपस्थितीत साजरी करावी, यात्रा कमिटी, मानकरी यांनी भाविकांची सुरक्षितता लक्षात घेऊन कोणताही अट्टाहास करू नये, अशी विनंती यावेळी पोलीस उपअधीक्षक डॉ. रणजित पाटील यांनी यावेळी केली. खंडोबा देवाचे भाविकांना ऑनलाईन दर्शन व्हावे, यादृष्टीने यूट्यूब चॅनेलच्या माध्यमातून ऑनलाईन दर्शनाची सोय यात्रा समितीने करावी, अशी सूचनाही त्यांनी केली. तसेच यात्रेसाठी दरवर्षी येणारे व्यावसायिक, दुकानदार हे यावर्षी येणार नाहीत. त्यादृष्टीने यात्रा समितीने कार्यवाही करण्याची सूचनाही करण्यात आली.
प्रास्ताविक प्रमुख मानकरी देवराज पाटील यांनी केले, तर आभार सह्याद्रीचे संचालक सर्जेराव खंडाईत यांनी मानले.
- चौकट
दहा किलोमीटर परिसरात रस्ते सील करणार
यात्रेपूर्वी व यात्रेनंतर जिल्हा व परजिल्ह्यातून पाल येथे भाविक येऊ नये, यासाठी सुमारे आठ ते दहा किलोमीटर परिसरात सर्व रस्ते सील करण्यात येणार असल्याचे प्रशासनाच्यावतीने यावेळी सांगण्यात आले. विविध विभागांच्यावतीने यात्रेच्या अनुषंगाने करण्यात येणाऱ्या उपाययोजनांबाबत बैठकीत माहिती देण्यात आली.
फोटो : ०२केआरडी०६
कॅप्शन : पाल (ता. कऱ्हाड) येथे खंडोबा यात्रेच्या पूर्वनियोजनाबाबत शनिवारी बैठक घेण्यात आली. या बैठकीस प्रांताधिकारी उत्तम दिघे, पोलीस उपअधीक्षक डॉ. रणजित पाटील, देवराज पाटील आदी उपस्थित होते. (छाया : अजय जाधव)