लोकमत न्यूज नेटवर्क
सातारा : जिल्ह्यात कोरोनाच्या दुसऱ्या लाटेत बाधितांचा महाविस्फोट सुरू असून, एका मे महिन्यातच सुरुवातीच्या एक वर्षातील रुग्णसंख्या नोंद झाली आहे. गेल्या वर्षी मार्चपासून या वर्षीच्या १६ मार्चपर्यंत ६१ हजार रुग्ण झाले होते. ही संख्या आता एका मे महिन्यातच नोंद झाली. तब्बल ६०९०६ बाधित आढळले, तर ११४७ जणांचा मृत्यू झाला आहे.
जिल्ह्यात गेल्या वर्षी मार्च महिन्याच्या शेवटच्या आठवड्यात कोरोना विषाणूचा पहिला रुग्ण आढळून आला होता. सुरुवातीला कोरोनाबाधितांचे प्रमाण खूपच कमी होते. कधी १०, २० तर कधी ५० पर्यंत दिवसाला रुग्ण आढळत होते. मात्र, मे महिना सुरू झाल्यापासून कोरोना रुग्णांचे प्रमाण झपाट्याने वाढत गेले. जून महिन्याच्या उत्तरार्धापासून तर कोरोनाबाधितांची संख्या दिवसाला शेकडोच्या पटीत वाढत गेली. तर सप्टेंबरअखेर बाधितांचा आकडा ३७ हजार पार झाला. तसेच मृत्यमुखी पडणाऱ्यांचीही संख्या वाढली. असे असले तरी आॅक्टोबर महिन्यापासून बाधित आणि मृतांचे प्रमाण कमी होत गेले. जानेवारपर्यंत स्थिती चांगली होती. मात्र, फेब्रुवारीपासून रुग्णसंख्या झपाट्याने वाढू लागली.
एप्रिल या एकाच महिन्यात जिल्ह्यात रेकॉर्ड ब्रेक रुग्ण सापडले. ३७ हजार २१८ नवीन रुग्णांची नोंद झाली. तर मे महिन्यात एप्रिलचा रेकॉर्ड मोडत तब्बल ६०९०६ बाधित सापडले. हा आकडा सुरुवातीच्या एक वर्षातील ठरला. कारण, गेल्या वर्षी २३ मार्चला जिल्ह्यात पहिला रुग्ण आढळला. तर या वर्षीच्या १६ मार्चपर्यंत एकूण ६१०२७ रुग्ण झाले होते. एक वर्षातील हा आकडा एका मे महिन्यातच गाठला. त्यामुळे जिल्ह्यातील कोरोना विस्फोटाची स्थिती लक्षात येते. जिल्ह्यात आतापर्यंत १ लाख ६६ हजार रुग्ण आणि ३६७७ जणांचा मृत्यू झाला आहे. या मृतांपैकी तब्बल ११४७ बळी हे मे महिन्यातील आहेत, तर या एकाच महिन्यात तब्बल ५७३५१ बरे झाले आहेत.
चौकट :
जानेवारी ते एप्रिलपर्यंतची कोरोना आकडेवारी...
- जानेवारी महिन्यात तर डिसेंबरच्या तुलनेत प्रमाण निम्म्यावर आले. नवीन १ हजार ४०२ रुग्णांची नोंद झाली. त्याचबरोबर २६ जणांचा कोरोनामुळे मृत्यू झाला. असे असले तरी कोरोनामुक्त ९७९ जण झाले होते.
- फेब्रुवारी महिन्यात २ हजार ४९१ नवीन रुग्ण स्पष्ट झाले. जानेवारीचा विचार करता जवळपास ११०० नवीन रुग्णांची भर पडली. तर ३६ जणांचा कोरोनामुळे मृत्यू झाला. त्यामुळे फेब्रुवारीत मृतांचा आकडाही १० ने वाढल्याचे दिसून आले. तर १ हजार ८५५ जण बरे झाले.
- मार्च महिन्यात कोरोनाचे नवीन ६ हजार ५४८ रुग्ण आढळले. फेब्रुवारीच्या तुलनेत २ हजार ४९० बाधित वाढले. तर ५१ जणांचा मृत्यू झाला. मागील महिन्यापेक्षा १५ ने मृत्युमुखी पडणाऱ्यांची संख्या वाढली, तर १ हजार २२३ जण कोरोनामुक्त झाले होते.
- एप्रिल महिन्यात ३७२१८ नवीन रुग्ण स्पष्ट झाले, तर ५८० जणांचा मृत्यू झाला. २२ हजार नागरिकांनी कोरोनावर मात केली. एप्रिलमध्ये गेल्या वर्षीच्या मार्चपासून सप्टेंबरपर्यंत ३७ हजार रुग्ण सापडले होते. सुरुवातीच्या सात महिन्यांतील रुग्णसंख्या एप्रिल या एका महिन्यातच सापडले होते.