सातारा: ज्येष्ठ अभिनेत्री जया पाटील (वय ५६, रा. कृष्णानगर, सातारा) यांच्या खून प्रकरणात शहर पोलिसांना अत्यंत महत्त्वाचे धागेदोरे हाती लागले असून, या खून प्रकरणाचा लवकरच उलगडा होणार आहे.
विविध मालिका आणि वेबसिरीजमध्ये काम करणाऱ्या ज्येष्ठ अभिनेत्री जया पाटील यांची शनिवार १६ रोजी मध्यरात्री राहत्या बंगल्यात अज्ञाताने गळा चिरून हत्या केली होती. या घटनेमुळे सिनेक्षेत्रात प्रचंड खळबळ उडाली होती. शहर पोलीस ठाण्यातील दोन पथके आणि स्थानिक गुन्हे शाखेचे एक पथक या खूनप्रकरणाचा तपास करत होते. गत चार दिवसांपासून पोलिसांनी तहान, भूक, हरवून तपासाला सुरुवात केली. अभिनेत्री जया पाटील यांच्या मोबाईलवर वारंवार फोन करणाऱ्या व्यक्तींचीही पोलिसांनी कसून चौकशी केली. यातूनच काही महत्त्वाची माहिती सातारा शहर पोलिसांच्या हाती लागली. संबंधितांकडे पोलीस कसून चौकशी करत असून, या खूनप्रकरणाचा पोलीस लवकरच उलगडा करणार आहेत.
जया पाटील या अभिनेत्री असल्यामुळे त्यांचा खून नेमका कोणत्या कारणातून झाला, याची उत्सुकता सातारकरांबरोबरच सिनेक्षेत्रातील त्यांच्या सहकाऱ्यांनाही आहे.