सातारा : कोरोनाच्या जोखडातून मुक्त झालेल्या बालकांना मल्टिसिस्टिम इन्फ्लमेंटरी सिंड्रोम अर्थात ‘एमएसआयसी’ हा आजार होत असल्याचे आढळून येत आहे. बऱ्याचदा कोरोनामुक्तीनंतर काही आठवड्यांनी या आजाराची लक्षणे जाणवत आहे. यामुळे चिमुकल्यांच्या हृदयावर विपरीत परिणाम होत असल्याचे तज्ज्ञ सांगतात.
कोरोनाच्या पहिल्या लाटेने लोकांना घाबरवले तर दुसऱ्या लाटेने सर्वांच्याच डोळ्यात पाणी आणले. दुसऱ्या लाटेत लहान मुलांना कोरोना संगर्स जास्त झाला. लाट काहीशी ओसरत असताना कोरोना पश्चात आजार समोर येत आहेत. यात ‘एमएसआयसी’ने सर्वांचीच चिंता वाढवली आहे.
मल्टिसिस्टीिम इन्फ्लमेंटरी सिंड्रोम या आजारात तीव्र ताप येतो. वेळीच निदान न झाल्यास शरीरावर चट्टे उठणे, डायरिया, वारंवार शौचास होणे, चक्कर येणे, अशक्तपणा जाणवणे, श्वास घेता न येणे असा त्रास होऊ शकतो. याशिवाय कोरोनरी आर्टरची समस्याही उदभवत आहे. कोरोनातून बरे झाल्यानंतर पालकांनी लहान मुलांच्या आरोग्याकडे विशेष लक्ष देणे गरजेचे आहे. हा आजार ० ते १८ वर्षे वयोगटातील लहान मुलांमध्ये होऊ शकतो. ज्या मुलांना आधीपासून कोणताही आजार असल्यास अशा मुलांना याचा धोका सर्वाधिक संभवतो. तुलनेने नवजात बालकांमध्ये हा आजार फारच दुर्मिळ आहे.
कोरोना बाधित झाल्यानंतर त्यातून बरे होणाऱ्यांना या आजाराने ग्रासले आहे. साधारण दोन ते पाच आठवड्यांनी या आजाराची लक्षणे दिसू लागतात. सहा वर्षांखालील मुलांच्या तुलनेत ६ ते १२ वर्षे वयोगटात या आजाराचे प्रमाण दुप्पट आणि १२ ते १८ या किशोरवयीन वयोगटात हे प्रमाण सर्वाधिक आहे. मध्यम स्वरूपाच्या आजारासाठी स्टेरॉईड्स तर तीव्र स्वरूपाच्या आजारात इम्युनोग्लोब्युलिन हे औषध सर्वाधिक उपयुक्त ठरत आहे.
चौकट
ही काळजी घ्या
मुलांना मास्कशिवाय बाहेर पडू देऊ नका
कोरोनातून बरे झालेल्या मुलांकडेही लक्ष ठेवा
कुठलेही लक्षण आढळल्यास डॉक्टरांना दाखवा
‘एमएसआयसी’ची अशी आहेत लक्षणे :
खूप ताप येणे, तो पाच दिवसांपर्यंत कमी न होणे
पोटात सतत दुखणे
डोळे लाल होणे
मळमळ, उलट्या होणे, त्वचेवर ‘रॅशेस’ पडणे
पॉइंटर
कोरोनाचे एकूण रुग्ण : १ लाख ८९ हजार ५८३
कोरोनावर मात केलेले रुग्ण :१ लाख ७६ हजार ६१३
जिल्ह्यात एकूण कोरोना मृत्यू : ४३०३
उपचार घेत असलेले रुग्ण : ८७२४
कोट :
कोरोना मुक्तीनंतर मुलांना कोणताही आजार होऊ नये यासाठी रोगप्रतिकारकशक्ती वाढविण्यासाठी आहारात योग्य तो बदल करणे आवश्यक आहे. मुलांच्या झोपेच्या वेळा, पौष्टिक आहार आणि नियमित व्यायामाकडे लक्ष देणे आवश्यक आहे, सार्वजनिक ठिकाणी मुलांना फिरायला घेऊन जाणे शक्यतो टाळणे आवश्यक आहे. योग्य निदान आणि वेळेवर उपचार झाले तर या आजाराला घाबरण्याचे काहीच कारण नाही.
- डॉ. भास्कर यादव, बालरोगतज्ज्ञ, सातारा