फलटण : कोविडच्या पार्श्वभूमीवर अनेक लोकांना आर्थिक फटका बसला आहे. अनेकांना आपल्या मुला-मुलींचा लग्नसोहळासुद्धा करता येत नाही. अशा लोकांना आधार देण्यासाठी येथील ज्येष्ठ नेते आणि सद्गुरू उद्योग समूहाचे प्रमुख दिलीपसिंह भोसले यांनी आपले मंगल कार्यालय लग्नासाठी मोफत देण्याची घोषणा केली आहे.
कोविडमध्ये सध्या अनेक लोक आर्थिक अडचणीत आहेत. शेतकरी, गरीब आणि मध्यमवर्गीय समाज खूपच अडचणीत आला असून, अनेकांची दोन वेळच्या जेवणाचीदेखील व्थवस्था होत नाही. तसेच गेल्या दीड वर्षापासून कोरोनामुळे अनेक मुलांचे लग्न झाले नाही. लग्नाचा खर्चही आता अनेकांना झेपणारा नसल्यामुळे त्या लोकांना मदत म्हणून मंगल कार्यालय मोफत उपलब्ध करून देण्याची घोषणा दिलीपसिंह भोसले यांनी पत्रकार परिषदेत केली आहे.