लोकमत न्यूज नेटवर्क
सातारा : कोणत्याही क्षेत्रात तन्मयतेने काम करण्यासाठी समाजाला योग्य दिशा, दृष्टी देऊन संपन्न करणे हे शिक्षकांचे काम आहे, असे प्रतिपादन ज्योतिषाचार्य प्राचार्य रमणलाल शाह यांनी केले.
शिक्षक दिनाचे औचित्य साधून कऱ्हाड येथील शिक्षण मंडळाच्यावतीने गुरूगौरव समारंभात ते बोलत होते. यावेळी शासकीय अभियांत्रिकी महाविद्यालयाचे डॉ. माधव कुमठेकर, शिक्षण मंडळाचे चेअरमन बाळासाहेब कुलकर्णी, सचिव चंद्रशेखर देशपांडे, सहसचिव राजेंद्र लाटकर यांची प्रमुख उपस्थिती होती. यावेळी मान्यवरांच्या हस्ते शिवाजी विद्यापीठ व्यवस्थापन परिषदेचे सदस्य व श्रीनिधी एज्युकेशन सोसायटीचे अध्यक्ष अमित कुलकर्णी यांना डॉ. रा. गो. प्रभूणे अमृतमहोत्सवी शिक्षण संस्थाभूषण व विद्यारत्न पुरस्कार प्रदान करण्यात आला. रोख रक्कम, सन्मानचिन्ह असे पुरस्काराचे स्वरूप आहे.
बाळासाहेब कुलकर्णी म्हणाले, हिंदवी स्कूलमध्ये सुरू असलेले विविध उपक्रम हे इतर शाळांसाठी अनुकरणीय असेच आहेत. आपले मनोगत व्यक्त करताना अमित कुलकर्णी म्हणाले, कऱ्हाड शिक्षण मंडळाच्यावतीने डॉ. प्रभुणे यांच्या नावाने देण्यात येणारा पुरस्कार म्हणजे आजपर्यंत शिक्षण क्षेत्रात केलेल्या कामाची पोचपावती आहे. हा पुरस्कार स्वीकारल्यानंतर शिक्षण क्षेत्रात काम करीत असताना आणखी जबाबदारी वाढली आहे. या सन्मानामुळे काम करण्याचे बळ वाढले असून, भविष्यात विद्यार्थी, शिक्षक आणि शिक्षण क्षेत्रात काम करणाऱ्या लोकांच्या हिताचे काम करण्याची ग्वाही देतो.
यावेळी डॉ. राजाराम कुंभार यांना डॉ. रा. गो. प्रभुणे गौरवग्रंथ पुरस्काराने सन्मानित करण्यात आले. तसेच अस्मिता पोद्दार, प्रशांत कुलकर्णी, विष्णू कुलकर्णी, किसन वाघमारे, चंद्रकांत काळे, स्नेहल वाळिंबे, अविनाश भांदिर्गे, गणेश इनामदार, प्रकाश वाघमारे, रोहिणी चव्हाण, अथर्व जोशी यांना विविध पुरस्कारांनी सन्मानित करण्यात आले. सुवर्णा देशपांडे व जीवन थोरात यांनी सूत्रसंचालन केले. सहसचिव राजेंद्र लाटकर यांनी आभार मानले.
फोटो २० पुरस्कार फोटो
कऱ्हाड येथील शिक्षण मंडळाच्यावतीने हिंदवी स्कूलचे संस्थापक अध्यक्ष, कोल्हापूर विद्यापीठाचे सिनेट सदस्य अमित कुलकर्णी यांचा प्रा. रमणलाल शाह यांच्या हस्ते गौरव करण्यात आला.