महाबळेश्वर : येथील महाड नाका रस्त्यालगत एका मोकळ्या जागेत बेकायदेशीररित्या अनधिकृत झोपडी उभारण्याचे काम होत असल्याची माहिती समजल्यावर वृत्तांकनसाठी गेलेले पत्रकार किरण गोरखनाथ शिंदे व सुमित संपत कांबळे (रा. महाबळेश्वर) यांना धक्काबुक्की, दमदाटी करून शिवीगाळ करण्यात आली. याप्रकरणी ऋषिकेश अरूण वायदंडे, सनी उर्फ अभिजीत ननावरे, मोहन कारंडे, राकेश देवकुळे व इतर २ जणांविरुद्ध महाबळेश्वर पोलीस ठाण्यात गुन्हा दाखल झाला आहे.
याबाबतची किरण शिंदे यांनी दिलेल्या फिर्यादीत म्हटले आहे की, महाबळेश्वर ते महाड नाका रोडलगत असलेल्या हॉटेल सत्काराच्या समोर शनिवार, दि. ९ रोजी सकाळी पावणेदहाच्या सुमारास येथील शासकीय मोकळ्या जागेत ऋषिकेश वायदंडे, सनी उर्फ अभिजीत ननावरे, मोहन कारंडे, राकेश देवकुळे व इतर दोघेजण असे एकत्रित जमून बेकायदेशीररित्या झोपडे उभारण्याचे काम करीत होते. त्यावेळी किरण शिंदे (रा. बॉन व्हयुव बंगला, महाबळेश्वर) व सुमित संपत कांबळे हे दोघेजण वृत्तांकनासाठी गेले असता चिडून ऋषिकेश वायदंडे, सनी उर्फ अभिजीत ननावरे, मोहन कारंडे, राकेश देवकुळे व इतरांनी धक्काबुक्की, दमदाटी करून, शिवीगाळ केली. तसेच जिवे मारण्याची धमकी दिली आहे. पोलीस निरीक्षक बी. ए. कोंडुभैरी यांच्या मार्गदर्शनाखाली पोलीस हवालदार दीपक जाधव व पोलीस नाईक श्रीकांत कांबळे तपास करीत आहेत.