कंग्राळकरांमुळे मूळ मालक अडचणीत! अवैध उत्खनन :

मिळकतीवर दंडाचा बोजा चढविला तर ‘तेलही गेले अन...’म्हणण्याची वेळ

 सातारा : राधिका रस्त्यावरील हरजिंदरसिंग संतोकसिंग गधोक यांच्या मालकीची जागा विकसित करण्याचे काम बिल्डर श्रीधर कंग्राळकर यांनी घेतले. मात्र, हे करत असताना त्यांनी शासनाचा कर बुडवून अवैध उत्खनन केल्याचे उघडकीस आले आल्याने मूळ मालक अडचणीत येण्याची चिन्हे दिसत आहेत.. महसूल प्रशासनाने याबाबत कारवाई सुरु केली आहे. कंग्राळकरांना केलेल्या २२ लाख ९५ हजार ७00 रुपयांचा दंड त्यांनी शासकीय तिजोरीत भरला नसल्याने या प्रकरणातील गुंता आणखी वाढण्याची शक्यता निर्माण झाली आहे. दंड न भरला गेल्यास गधोक यांच्या मालकीच्या मिळकतीवर बोजा चढविण्याचे अधिकारही महसूल प्रशासनाला असल्याने गधोक चांगलेच अडचणीत आले आहेत. येथील बांधकाम व्यावसायिक श्रीधर कंग्राळकर यांनी राधिका रस्त्यावरील सि.स.नं.२८३/१अ प्लॉट नं. १ मध्ये उत्खनन केल्याचे उघड झाल्यानंतर महसूल विभागातर्फे पंचनामा करून त्यांना तब्बल २२ लाख ९५ हजार ७०० रुपये दंडाची नोटीस धाडण्यात आली होती. या नोटिसीची मुदत सोमवारी (दि.२८) संपली. कंग्राळकरांनी या मुदतीत हा दंड भरलेला नाही. तहसीलदारांनी यापूर्वी दिलेल्या आदेशाविरोधात कंग्राळकर यांनी प्रांताधिकाऱ्यांकडे अपील केले आहे. या अपिलाबाबत प्रांताधिकाऱ्यांनी कोणताही निर्णय घेतलेला नाही. तहसीलदारांनी महाराष्ट्र जमीन महसूल अधिनियम १९६६ चे कलम ४८ नुसार कारवाई सुरू केली आहे. बुधवारी ही नोटीस दिली जाणार असल्याने दंड भरण्यासाठी तिथून पुढे सात दिवसांची मुदत कंग्राळकरांना देण्यात येणार आहे. (प्रतिनिधी)