सातारा : सातारा शहरातील अंतर्गत रस्त्यांची मोठ्या प्रमाणात दुरवस्था झाली आहे. पालिकेकडून भर पावसात हे खड्डे खडी व मुरूम टाकून मुजविण्याचे काम हाती घेण्यात आले आहे. उशिरा का होईना पालिकेने डागडुजीचे काम हाती घेतल्याने वाहनधारकांना मोठा दिलासा मिळाला.
सातारा शहर डोंगरउतारावर वसल्याने अतिवृष्टीचा शहरावर मोठा प्रभाव पडत नाही. मात्र, शहरातील रस्त्यांची मोठ्या प्रमाणात दुरवस्था होते. पावसाळा सुरू झाला की खड्ड्यांचा विषय हा नेहमीच चर्चेचा ठरतो. पालिकेने पावसाळा सुरू होण्यापूर्वी शहरातील प्रमुख रस्त्यांचे डांबरीकरण उरकून घेतले. मात्र, अंतर्गत रस्त्यांची अवस्था दयनीय झाली असून, याचा वाहनधारकांसह नागरिकांना याचा नाहक त्रास सहन करावा लागत आहे.
ठिकठिकाणी पडलेल्या खड्ड्यांमधून वाट काढताना वाहनधारकांना तारेवरची कसरत करावी लागत आहे. शहरात ज्या भागात भुयारी गटार योजनेचे काम झाले आहे त्या भागातील रस्ते केवळ नावापुरतेच उरले आहे. पावसाळ्यापूर्वी पालिकेने काही ठिकाणचे रस्ते खडी टाकून मुजविले; परंतु मुसळधार परिस्थिती पुन्हा जैसे थे झाली. शहर व परिसरात गेल्या तीन-चार दिवसांपासून संततधार पाऊस सुरू आहे. या पावसातच पालिकेने खड्ड्यांच्या मलमपट्टीचे काम हाती घेतले आहे. वाहनधारकांना या कामामुळे दिलासा मिळाला असला तरी भर पावसात खड्डे दुरुस्तीचे काम हाती घेण्यात आल्याने वाहनधारकांमधून आश्चर्य व्यक्त होत आहे.
फोटो : ०८ जावेद खान ०२
सातारा नगरपालिकेकडून शहरातील अंतर्गत रस्त्यांवर पडलेले खड्डे खडी व मुरूम टाकून मुजविण्याचे काम हाती घेण्यात आले आहे. (छाया : जावेद खान)