फलटण : ब्रिटिश सैन्य दलातील महार बटालीयनने २०० वर्षांपूर्वी पेशव्यांच्या विरुद्ध लढताना दाखविलेल्या शौर्याचे स्मरण आणि त्या युद्धात धारातीर्थी पडलेल्या सैनिकांच्या स्मृतिप्रीत्यर्थ ब्रिटिशांनी उभारलेल्या विजयस्तंभ प्रतिकृतीस अभिवादन करण्यासाठी शासकीय अधिकारी आणि शहर व तालुक्यातील मान्यवरांसह जनतेने दिवसभर मोठी गर्दी केली होती.
फलटणमधील डॉ. बाबासाहेब आंबेडकर चौक येथे भीमा कोरेगाव विजयस्तंभाची प्रतिकृती उभारून, मानवंदना देण्याचे नियोजन भारतरत्न डॉ. बाबासाहेब आंबेडकर जयंती महोत्सव समितीच्या माध्यमातून करण्यात आले होते; परंतु जिल्ह्यात लावण्यात आलेली जमावबंदी तसेच कोरोना विषाणूचा प्रादुर्भाव आणि नूतन वर्षारंभाच्या पार्श्वभूमीवर कायदा व सुव्यवस्थेचा प्रश्न निर्माण होऊ नये म्हणून हा विजयस्तंभ अभिवादन कार्यक्रम भारतरत्न डॉ. आंबेडकर स्मृतिभवन, भीमस्फूर्ती भूमी (शेरी), मंगळवार पेठ येथे आयोजित केला होता.
याप्रसंगी प्रांताधिकारी डॉ. शिवाजीराव जगताप, उपविभागीय पोलीस अधिकारी तानाजी बरडे, नगर परिषद मुख्याधिकारी प्रसाद काटकर, शहर पोलीस ठाण्याचे सहायक पोलीस निरीक्षक राऊळ, डॉ. बाबासाहेब आंबेडकर जयंती महोत्सव समितीचे पदाधिकारी, ज्येष्ठ नागरिक, नगरसेवक उपस्थित होते. तसेच डॉ. बाबासाहेबांच्या पुतळ्यास पुष्पहार घालून अभिवादन केले. याप्रसंगी जयंती महोत्सव समिती पदाधिकारी, सदस्य, विद्यार्थी, नागरिकांनी घोषणा देऊन भीमा कोरेगाव शौर्य दिन साजरा केला.
फोटो :०२फलटण-अभिवादन
फलटण येथील डॉ. बाबासाहेब आंबेडकर यांच्या पुतळ्यास प्रांताधिकारी डॉ. शिवाजीराव जगताप यांनी पुष्पहार अर्पण करून अभिवादन केले. यावेळी उपविभागीय पोलीस अधिकारी तानाजी बरडे उपस्थित होते. (छाया : नसीर शिकलगार)