फलटण : ‘महिला शिक्षण क्रांतीच्या आद्य प्रवर्तक क्रांतिज्योती सावित्रीबाई फुले यांची १९० वी जयंती विविध कार्यक्रमांद्वारे साजरी करण्यात आली. फलटण येथील या बालगटातील आयडियल स्कूल इंटरनॅशनल स्कूलची विद्यार्थिनी श्रावणी बोबडे या बालिकेने ‘मी सावित्रीबाई फुले बोलतेय’ हा एकपात्री लघू प्रयोग सोशल मीडियाच्या माध्यमातून फलटणकरांच्या समोर सादर केला. श्रावणीच्या या प्रयोगाचे कौतुक अवघ्या फलटणरांनी केले.
सावित्रीबाई फुले जयंतीनिमित्त आयडियल स्कूलच्या अध्यक्षा वैशाली शिंदे यांनी विविध उपक्रम राबवले. यापैकीच एक उपक्रम म्हणजे महापुरुषांची जयंती व पुण्यतिथीनिमित्त त्यांच्यावर आधारित माहिती आणि चरित्र विद्यार्थ्यांनी सर्वांसमोर मांडायचे. याच उपक्रमाचा भाग म्हणून श्रावणीने हा लघू प्रयोग सादर केला. तिच्या या प्रयोगाचे कौतुक सर्व पालक, विद्यार्थी व शिक्षकांनी केले. इतक्या लहान वयात सावित्रीबाई फुले यांचे चरित्र अभ्यासून त्यावर आधारित ‘मी सावित्रीबाई फुले बोलतेय’ ही एकपात्री लघुनाटिका सादर केल्यावर, खऱ्याअर्थाने सावित्रीबाई फुले यांना त्यांच्या जयंतीनिमित्त अभिवादन करण्यात आले.
सध्या कोरोना विषाणूच्या संसर्गामुळे शाळा बंद आहेत, तरीही विद्यार्थ्यांना महापुरुषांची ओळख करून देण्यासाठी आयडियल स्कूलने राबविलेला उपक्रम प्रेरणादायी आहे. याबद्दल वैशाली शिंदे यांचे व श्रावणी व तिच्या पालकांचे विशेष कौतुक होत आहे.