फलटण : स्वच्छ सर्वेक्षण २०२१ व माझी वसुंधरा अभियानाअंतर्गत फलटण नगरपरिषदेच्यावतीने शहरातील मुख्य चौक, व्यापारी ठिकाणे, जास्त रहदारी असलेल्या भागात, शाळांमध्ये हरित शपथ देण्यात आली.
फलटण नगरपरिषदेच्यावतीने माझी वसुंधरा अभियान राबविण्यात येत असून त्यादृष्टीने मुख्याधिकारी प्रसाद काटकर, उपमुख्याधिकारी मुश्ताक महात, नगरपरिषदेचे आरोग्य विभागाचे प्रमुख विनोद जाधव, तसेच नगरपालिकेचे सर्व अधिकारी, कर्मचारी, नगरसेवक यांच्या उपस्थितीत शहरातील मुख्य मार्गावर स्वच्छता व हरित प्रभात फेरी काढण्यात आली. शहराच्या मुख्य प्रवेशद्वाराजवळ श्रमदानाद्वारे साफसफाई करण्यात आली. या स्वच्छता व जनजागृती मोहिमेत ५०० ते ६०० नागरिक सहभागी झाले होते. सर्वांना स्वच्छता, आरोग्य, निसर्गाशी असलेली कटिबद्धता निश्चित करण्यासाठी तसेच वसुंधरेशी संबंधीत पृथ्वी, वायू, जल, अग्नी आणि आकाश या पंचतत्त्वांवर पर्यावरण व वातावरणीय बदलाचे महत्त्व सांगून स्वच्छ व सुंदर फलटण कसे करता येईल, यासंदर्भात माहिती देण्यात आली .
आपण सर्व पर्यावरणाचे रक्षक आहोत म्हणून काम करावे, असे आवाहन नगरपालिकेतर्फे करण्यात आले
यावेळी मुख्याधिकारी, नगरसेवक, सर्व आरोग्य कर्मचारी, अधिकारी, कर्मचारी उपस्थित होते.
(फोटो - यशवंतराव चव्हाण हायस्कूल येथे हरित शपथ घेताना विद्यार्थी,शिक्षक)