कोरोनाच्या पार्श्वभूमीवर आरोग्य सेविका, अंगणवाडी सेविका, ग्रामसेवक, ग्रामविकास अधिकारी यांना लसीकरण करण्यात आले, तर काहींना लसीकरण सुरू आहे; पण ग्रामपंचायतीच्या कर्मचाऱ्यांबद्दल शासकीय पातळीवर हालचाली दिसून येत नाहीत. २० मार्चपासून कोरोनाबाधित रुग्ण सापडण्यास सुरुवात झाली. आणि बघता-बघता कोरोनाचे लोण ग्रामीण भागात पोहोचले. त्याचा ताण महसूल, आरोग्य विभाग आणि ग्रामपंचायतींवर येऊन पडला. यामध्ये सर्व विभागांनी कोरोनाचा मुकाबला करण्यासाठी हातात हात घालून काम केले.
गावात ग्रामपंचायतीच्या माध्यमातून कोरोनाशी लढा देण्यासाठी ग्रामपंचायतीचे कर्मचारी सर्वात पुढे होते. सुरुवातीच्या काळात ज्या प्रभागात रुग्ण सापडेल त्या ठिकाणी कंटेन्मेंट झोन करण्याचे काम ग्रामपंचायत कर्मचाऱ्यांवर होते. तसेच आरोग्य सेवक, अंगणवाडी सेविका यांच्याबरोबर ग्रामपंचायत कर्मचारी लढ्यात व्यस्त होते. कर्मचाऱ्यांनी स्वत:चा जीव धोक्यात घालून गावागावांत चोवीस तास काम केले. मात्र, कोरोनाची लस देण्यासाठी दुजाभाव का, असा प्रश्र्न ग्रामपंचायतीच्या कर्मचाऱ्यांकडून उपस्थित केला जात असून, शासनाने लवकरात लवकर लसीकरण करावे, अशी मागणी होत आहे.