शिरवळ : नायगाव परिसरात टोमॅटो व्यापारी बनून वावरत शेतकऱ्यांच्या शेतामधील शेती अवजारे चोरून विक्री करणाऱ्या परजिल्ह्यातील टोळीचा शिरवळ पोलिसांनी पर्दाफाश केला. याप्रकरणी सोलापूर जिल्ह्यातील चार युवकांना अटक केली. संबंधित युवकांकडून शिरवळ पोलिसांनी चोरीस गेलेले दोन रोटाव्हेटर व गुन्ह्यात वापरलेल्या जीपसह ४ लाख ४५ हजार रुपये किमतीचा मुद्देमाल हस्तगत केला आहे.
सीताराम लक्ष्मण येडगे, उमाजी शिवाजी मदने, ज्ञानेश्वर अनिल जाधव, विशाल रामचंद्र मदने अशी अटक केलेल्यांची नावे आहेत. शिरवळ पोलिसांनी दिलेली माहिती अशी की, नायगाव येथील शेतकरी परमेश्वर दशरथ नेवसे यांच्या मालकीच्या शेतामध्ये ठेवलेला ५५ हजार रुपये किमतीचा रोटाव्हेटर शुक्रवार, दि. १७ तर नायगाव येथील संतोष लक्ष्मण नेवसे यांच्या मालकीचा घरासमोर ठेवलेला ४० हजार रुपये किमतीचा रोटाव्हेटर चोरून नेल्याची फिर्याद शिरवळ पोलीस ठाण्यात दिली होती. यावरून अज्ञातांविरुद्ध गुन्हा दाखल केला होता.
शिरवळ पोलीस ठाण्यात गुन्हा दाखल झाल्यानंतर पोलीस अधीक्षक अजयकुमार बन्सल, अपर पोलीस अधीक्षक धीरज पाटील, फलटणचे उपविभागीय पोलीस अधिकारी तानाजी बरडे, पोलीस निरीक्षक नवनाथ मदने यांच्या सूचनांनुसार शिरवळचे सहाय्यक पोलीस निरीक्षक राजकुमार भुजबळ यांच्या नेतृत्वाखाली पोलीस उपनिरीक्षक सागर अरगडे, पोलीस उपनिरीक्षक प्रमोद दीक्षित, सहाय्यक पोलीस उपनिरीक्षक पांडुरंग हजारे, पोलीस अंमलदार जितेंद्र शिंदे, अमोल जगदाळे, स्वप्नील दौंड यांच्या पथकाने तांत्रिक माहिती व सीसीटीव्ही कॅमेरे याचा अभ्यास केला. त्यानंतर रोटाव्हेटर चोरी करणारे सराईत युवक सीताराम लक्ष्मण येडगे (वय २८), उमाजी शिवाजी मदने (२१), ज्ञानेश्वर अनिल जाधव (२२), विशाल रामचंद्र मदने (१९, सर्व, रा. पाणीव, ता. माळशिरस, जि. सोलापूर) यांनी जीप (क्र. एमएच ४५ एएफ ०५५०) मधून चोरून नेल्याचे तपासात निष्पन्न झाले.
त्यानुसार शिरवळ पोलिसांनी पाणीव या ठिकाणी सापळा रचत संबंधितांच्या मुसक्या आवळत नायगाव परिसरातील चोरून नेलेले दोन रोटाव्हेटर, पिकअप जीपसह ४ लाख ४५ हजार रुपयांचा मुद्देमाल जप्त केला. संबंधित युवकांना पोलीस कोठडीची मुदत संपल्यानंतर खंडाळा येथील न्यायालयासमोर उभे केले असता न्यायालयीन कोठडी सुनावली आहे. सहाय्यक पोलीस उपनिरीक्षक पांडुरंग हजारे तपास करीत आहेत.
२०शिरवळ
नायगाव या ठिकाणी रोटाव्हेटर चोरणाऱ्या टोळीला अटक केली. (छाया : मुराद पटेल, शिरवळ)