खंडाळा : सार्वजनिक बांधकाम विभागाने खंडाळा-लोणंद रस्त्याच्या डांबरीकरणाचे काम हाती घेतले. मात्र रस्त्याच्या दुतर्फा असणाऱ्या साईडपट्ट्यांवर टाकलेले मुरूमाचे ढिगारे तसेच असल्याने अपघाताचा धोका वाढला होता. याबाबत ‘लोकमत’ने आवाज उठविल्यानंतर संबंधित ठेकेदाराने साईडपट्ट्यांवर मुरूम पसरण्याचे काम सुरू केले आहे. या समस्येवर मार्ग निघाल्याने जनतेतून समाधान व्यक्त होत आहे.
खंडाळा ते लोणंद रस्त्याच्या डांबरीकरणाचे काम सध्या सुरू आहे. रस्त्याच्या दोन्ही बाजूच्या साईडपट्ट्या भरण्यासाठी ठेकेदारांनी मुरूमाचे ढीग जागोजागी टाकले आहेत. गेल्या महिनाभरात हा मुरूम पसरला नसल्याने तसेच ढीग बाजूला होते. यातील काही मुरूम रस्त्यावरही पडला होता. त्यामुळे दुचाकी वाहने घसरून छोटे - मोठे अपघात होत होते. तसेच परिसरातील ग्रामस्थांना शेतात आणि विविध कामांना जाण्यासाठी जागाच शिल्लक राहिली नव्हती. रस्त्यावरून भरधाव वेगाने धावणारी वाहने जात असल्याने जीविताला धोका वाढला होता. त्यातच तालुक्यात रस्त्याच्या बाजूने जाणाऱ्या तीन पादचाऱ्यांना एका वाहनाने ठोकरल्याने त्यांना नाहक प्राण गमवावे लागल्याची घटना घडली होती. त्यामुळे नागरिकांमध्ये भीतीचे वातावरण होते.
शाळा सुरू झाल्याने रस्त्याच्या बाजूने जाणाऱ्या विद्यार्थ्यांची संख्याही मोठी आहे. त्यांनाही अपघाताचा धोका निर्माण होऊ शकतो. त्यामुळे रस्त्याच्या बाजूचा मुरूम पसरून रस्ता सुरक्षित करावा, अशी जनतेची मागणी ‘लोकमत’ने उचलून धरली होती. त्याची दखल घेऊन बांधकाम विभागाने ठेकेदाराला तातडीने हे काम करण्यास भाग पाडले.
(कोट)
खंडाळा-लोणंद रस्त्याच्या बाजूने मुरूमाचे पडलेले ढीग पसरले नसल्याने अपघातांची मालिका सुरू होती. त्याचा नाहक त्रास ग्रामस्थांना सहन करावा लागत होता. रस्ता वाहतूक सुरक्षित करण्यासाठी हे काम तातडीने करावे, ही मागणी ‘लोकमत’ने प्रभावीपणे मांडली. त्यामुळे काम सुरू झाले. याबाबत समाधान वाटते .
- महेश राऊत, ग्रामस्थ, म्हावशी
फोटो : १० खंडाळा
खंडाळा-लोणंद मार्गावरील साईडपट्ट्या भरण्याचे काम बांधकाम विभागाकडून हाती घेण्यात आले आहे. (छाया : दशरथ ननावरे)
लोगो : लोकमत फॉलोअप