लोकमत न्यूज नेटवर्क
सातारा : सर्वसामान्य कामगारांच्या सामाजिक सुरक्षेसाठी कार्यरत असलेल्या कर्मचारी राज्य विमा महामंडळ, ठाणे यांच्यावतीने कामगारांच्या वैद्यकीय सोयीसाठी मोठे पाऊल उचलले आहे. महाराष्ट्रातील मुंबई दक्षिण, पुणे व कोल्हापूर जिल्हे वगळता सर्व जिल्ह्यांमध्ये नोंदणीकृत असलेले कामगार आता प्रधानमंत्री जनआरोग्य योजनेतील संलग्न हॉस्पिटलमध्ये उपचार घेऊ शकतील.
यापूर्वी नोंदणीकृत कामगार ईएसएससीच्या रुग्णालयांमध्ये किंवा खासगी रुग्णालयांमध्ये उपचार घेऊ शकत होते; परंतु आता प्रधानमंत्री जन आरोग्य योजनेतील सर्व रुग्णालयांमध्ये त्यांना उपचार घेता येतील. नोंदणीकृत असलेल्या कामगारांना उपचारासाठी खर्चाची मर्यादा नाही.
ईएसआयसीचे पुणे उपविभाग प्रमुख हेमंत कुमार पांडे म्हणाले की, ही सोय ११ जानेवारीपासून कामगारांना लागू झालेली आहे. यासाठी नोंदणीकृत कामगारांनी आपले की पहचान अथवा हेल्थ पासबुक तसेच कोणतेही एक ओळखपत्र जसे आधार, पॅनकार्ड, मतदान कार्ड घेऊन प्रधानमंत्री जन आरोग्य योजनेच्या रुग्णालयांमध्ये असलेल्या आरोग्य मित्र व्यक्तीशी संपर्क करावा, आरोग्य मित्र कामगारांचे रजिस्ट्रेशन जनआरोग्य योजनेमध्ये करेल. कामगारांनी आपला मोबाईलसुद्धा यावेळी जवळ ठेवावा. या सुविधा मिळविण्यासाठी कोणतीही रक्कम भरण्याची गरज नाही तसेच कोणत्याही रेफरल लेटरची गरज नाही. परंतु प्राथमिक उपचार ईएसआयसीच्या डिस्पेंसरीमध्ये मिळतील. यासंदर्भात काही अडचणी असल्यास कामगारांनी आपल्या शाखा कार्यालयाशी संपर्क साधावा. प्रधानमंत्री जन आरोग्य योजनेतील सलग्न रुग्णालयाची यादी एसएससीच्या संकेत स्थळावर उपलब्ध आहे.
चौकट
सातारा शहरात ईएसआयसीसाठी सातारा डायग्नोस्टिक सेंटर एकमेव हॉस्पिटल होते. औद्योगिकरण मोठ्या प्रमाणावर वाढल्याने कामगारांची संख्या वाढली. ईएसआयसीला या कामगारांचे पैसे वर्ग होतात; मात्र आरोग्यसेवा मर्यादित होती. आता २७ हॉस्पिटल्स उपलब्ध झाल्याने कामगार यांची सोय झालेली आहे.
सातारा जिल्ह्यातील ही रुग्णालये आहेत संलग्न
दोलताडे हॉस्पिटल, म्हसवड, चिरंजीव हॉस्पिटल अँड रिसर्च सेंटर, फलटण, के एम आर एफ एस निकोप हॉस्पिटल, फलटण, फलटण लाईफ लाईन हॉस्पिटल प्रायव्हेट लिमिटेड, फलटण, सिविल हॉस्पिटल, सातारा, गुजर मेमोरियल हॉस्पिटल, कराड, कॅन्सर सेंटर प्रायव्हेट लिमिटेड, सातारा, संजीवन प्रायव्हेट लिमिटेड, सातारा, श्री मंगलमूर्ती क्लिनिक अँड रिसर्च सेंटर, सातारा, यशवंत हॉस्पिटल, सातारा, विजय काटकर हॉस्पिटल प्रायव्हेट लिमिटेड, वडूज, गीतांजली हॉस्पिटल, वाई, घोटवडेकर हॉस्पिटल, वाई, कोळेकर हॉस्पिटल, कऱ्हाड, कृष्णा हॉस्पिटल, कऱ्हाड, सह्याद्री हॉस्पिटल, कऱ्हाड, सिटी हंड्रेड, कऱ्हाड शारदा क्लिनिक मल्टिस्पेशालिटी हॉस्पिटल, कऱ्हाड, हॉस्पिटल, खंडाळा, पाटील हॉस्पिटल प्रायव्हेट लिमिटेड, कोरेगाव, कोरेगाव श्रीरंग नर्सिंग होम अँड डायलिसिस सेंटर, कोरेगाव, सावित्री हॉस्पिटल, लोणंद,
हॉस्पिटल म्हसवड.