सातारा : जिल्हा मध्यवर्ती बँकेच्या निवडणुकीमध्ये युद्धापूर्वीची शांतता पाहायला मिळते आहे. विद्यमान संचालक आमदार जयकुमार गोरे आणि त्यांचे मित्र माढाचे खासदार रणजितसिंह नाईक निंबाळकर या दोघांची नावे मतदार यादीतून वगळण्यात आली आहेत. विविध संस्थांमधून या दोघांचे ठराव झाले असल्याने या दोघांनाही तांत्रिक लढाई लढावी लागणार असून, निवडणूक विभागाकडून दिल्या जाणाऱ्या हरकतींवरील निकालाकडे लक्ष लागले आहे.
जिल्हा बँकेने प्रसिद्ध केलेल्या १९६३ जणांच्या कच्च्या मतदार यादीवर ४६ आक्षेप दाखल झाले असून, या हरकतींवर विभागीय सहनिबंधक कार्यालय कोल्हापूर येथे सुनावणी सुरू आहे. गृहनिर्माण संस्थेतून खासदार रणजितसिंह नाईक-निंबाळकर व आमदार जयकुमार गोरे यांनी केलेले ठराव ते दोघे संस्था सभासद नसल्याचे कारण देत सातारा जिल्हा बँकेने रद्द केले होते.
जिल्हा बँकेने सभासद नसल्याचे कारण देत दोघांचेही ठराव रद्द केले आहेत. यासंदर्भात कोल्हापूर येथे विभागीय सहनिबंधकांसमोर बुधवारी दीड तास सुनावणी झाली. भाजपच्या दोन्ही लोकप्रतिनिधींनी विभागीय सहनिबंधकांकडे दाखल केलेल्या आक्षेपावर दीड तास सुनावणी झाली. यावेळी वकिलांच्या माध्यमातून युक्तिवाद करण्यात आला. आता बुधवारी (दि. २२) सहनिबंधक सुनावणीवरील निकाल देणार आहेत.
जिल्हा मध्यवर्ती सहकारी बँकेच्या निवडणुकीसाठी विद्यमान संचालक आमदार जयकुमार गोरे आणि भाजपचे खासदार रणजितसिंह नाईक-निंबाळकर या दोघांना अपात्र ठरविण्यात आले. कोत्या बुद्धितूनच अपात्रतेचा निर्णय झाल्याची टीका आ. गोरे यांनी केली होती. तसेच यादीतील नाव वगळले गेले तर उच्च न्यायालयात जाण्याचा इशाराही त्यांनी दिला आहे.
तसेच बँक म्हणजे निवडणूक आयोग नाही. निवडणूक प्राधिकरणाने पाहणीसाठी मतदार यादी बँकेला दिली होती. बँकेने राजकारण करून यादीतील नावे अपात्र केली आहेत. बँकेने अधिकार नसताना घेतलेला हा निर्णय बेकायदेशीर आहे. मी सोसायटी सभासद आहे की नाही, हे ठरविण्याचा अधिकार बँकेला कोणी दिला. सहनिबंधकांकडे सुनावणीवेळी म्हणणे सादर केले आहे. २२ सप्टेंबरला निकाल दिला जाईल. तसेच २७ सप्टेंबरला अंतिम मतदार यादी प्रसिद्ध केली जाईल. त्यानंतर न्यायालयात जाण्याबाबतचा निर्णय घेतला जाणार असल्याचे आमदार जयकुमार गोरे यांनी सांगितले.
आणखी तक्रारींची शक्यता...
जिल्हा बँकेसाठी तयार केलेल्या कच्च्या मतदार यादीवर ४६ हरकती नोंदविण्यात आल्या होत्या. या हरकतींचा निकाल दि. २२ सप्टेंबर रोजी दिला जाणार आहे. आमदार गोरे व खासदार नाईक निंबाळकर यांच्याव्यतिरिक्त आणखी कोणी लढण्याचा निर्णय घेतला जाऊ शकतो.