महाविद्यालयीन तरुणाचा खून; दोघाजणांना अटक

महाविद्यालयीन तरुणाचा खून; दोघाजणांना अटक

पुणे : किरकोळ कारणावरून झालेल्या बाचाबाचीनंतर दोघाजणांनी मारहाण करीत महाविद्यालयीन तरुणाचा खून करण्यात आला़ याप्रकरणी भारती विद्यापीठ पोलिसांनी २४ तासांत दोघांना अटक केली आहे़ आशिष विभिषण पवार (वय २०, रा़ आसावरी, नांदेड सिटी) आणि आकाश अनिलकुमार डोके (२०, रा़ दामोदरनगर, हिंगणे खुर्द) अशी अटक केलेल्या महाविद्यालयीन तरुणांची नावे आहेत़ गौरव रामचंद्र जाधव (२१, रा़ सिंहगड इन्स्टिट्यूट हॉस्टेल, आंबेगाव बुद्रुक, मूळ घुरसाळे, ता़ खटाव, जि़ सातारा) असे खून झालेल्या तरुणाचे नाव आहे़ मनोज सुभाषचंद्र चोरडिया (वय २४, रा़ नवले पुलाजवळ) आणि अभिजित शिंदे हे जखमी झाले असून त्यांच्यावर खासगी रुग्णालयात उपचार करण्यात येत आहे़ ही घटना सिंहगड कॉलेज कॅम्पसमध्ये रविवारी रात्री ११ वाजता घडली़ याप्रकरणी अभिजित प्रभाकरराव शिंदे (वय २२, रा़ मधुकोष बिल्डिंग, धायरी) यांनी फिर्याद दिली आहे़ यातील सर्वजण सिंहगड कॉलेजचे विद्यार्थी असून ते वेगवेगळ्या पदवी अभ्यासक्रमांचे शिक्षण घेत आहेत़ गौरव जाधव, मनोज चोरडिया हे शुभम चौधरी या मित्राचा वाढदिवस साजरा करुन रात्री कॉलेजच्या कॅम्पसमधील एव्हिकेशन कॉलेजजवळच्या पायऱ्यांवर बसले होते़आशिष पवार, आकाश डोके हे आंबेगाव येथील जत्रेला जाऊन तेथे आले़ एकाने त्यांची ओळख करुन दिली़ तेव्हा गौरव जाधव याने ओळख दाखविली नाही़ त्यावरुन त्याच्यात व आशिष पवार याच्यात बाचाबाची व शिवीगाळ झाली़ आभिजित शिंदे याचा मित्र आकाश कराडकर याने दोघांची समजूत घालून त्यांना तेथून पाठविले़ मात्र, या बाचाबाचीचा राग मनात धरून आकाश डोके हातात बांबू घेऊन आला व त्याने गौरव जाधव याच्या पायावर, डोक्यावर बांबूने मारहाण केली़ आशिष पवार याने मनोज चोरडिया यालाही बांबूने मारहाण केली़ ते पाहून शिंदे हा पळत जाऊन मदतीसाठी आकाश कराडकर याला बोलवून घेऊन आला़ तेव्हा पवार याने कराडकर यालाही बांबूने मारहाण केली़ त्यानंतर ते पळून गेले़ तिघांनाही तातडीने खासगी रुग्णालयात दाखल करण्यात आले़ उपचारादरम्यान सोमवारी रात्री गौरवाचा मृत्यू झाला़ भारती विद्यापीठ पोलिसांनी खुनाचा गुन्हा दाखल केला़ या दोघांचा शोध घेत असताना ते मूळगावी पळून जाण्यासाठी आकुर्डी रेल्वे स्टेशनच्या प्रवेशद्वारापाशी थांबले असल्याची माहिती मंगळवारी सकाळी भारती विद्यापीठ पोलीस ठाण्यातील पोलीस उपनिरीक्षक समाधान कदम यांना मिळाली़ तेथे जाऊन पोलिसांनी दोघांना तातडीने अटक केली़ गुन्हा दाखल झाल्यानंतर २४ तासांच्या आत आरोपींना पकडण्यात पोलिसांनी यश मिळविले़ या दोघांना न्यायालयात हजर करण्यात आले़ सरकारी वकिलांनी तपासासाठी पोलीस कोठडीची मागणी केली़ न्यायालयाने दोघांना ३१ मार्चपर्यंत पोलीस कोठडी मंजूर केली आहे़