कऱ्हाड : गत काही दिवसांपासून तालुक्यात ढगाळ वातावरण आहे. दररोज दुपारनंतर मोठ्या प्रमाणावर ढग जमा होत आहेत. तसेच पावसाची चिन्हे निर्माण होत आहेत. काही वेळा ठिकठिकाणी पाऊस हजेरी लावतो, तर अनेक ठिकाणी पाऊस हुलकावणी देतो. माॅन्सूनचा पहिला पाऊस चांगला झाल्यामुळे शेतकऱ्यांना दिलासा मिळाला आहे.
नागरिकांची गैरसोय
कऱ्हाड : सैदापूर, कृष्णा कॅनॉल चौक परिसरात नागरिकांची स्वच्छतागृहाअभावी गैरसोय होत आहे. कृष्णा कॅनॉल परिसरात व्यवसाय मोठ्या प्रमाणात वाढले आहेत. त्यामुळे या ठिकाणी नागरिकांची वर्दळ जास्त प्रमाणात असते. स्वच्छतागृह नसल्यामुळे नागरिकांची गैरसोय होत असून, या ठिकाणी ग्रामपंचायतीने स्वच्छतागृहाची सोय करावी, अशी मागणी नागरिक, विद्यार्थ्यांकडून होत आहे.
अंधाराचे साम्राज्य
मलकापूर : मलकापूर भाजी मंडई ते कृष्णा रूग्णालय परिसरात उपमार्गावर महिलांची नेहमीच वर्दळ असते़ या परिसरात पथदिव्यांची कोणतीही सोय नसल्याने अनेक वेळा अनुचित प्रकार घडतात़ हा परिसर रात्रीच्या वेळी निर्मनुष्य असतो. तसेच येथे उड्डाणपूल असल्याने अंधाराचे साम्राज्य असते. अनुचित घटना रोखण्यासाठी येथे पथदिव्यांची सोय करणे गरजेचे आहे़
वन्यप्राण्यांचा उपद्रव
सणबूर : पाटण तालुक्यातील ढेबेवाडी विभागात सध्या तरस, लांडगा, रानडुक्कर यांचा उपद्रव वाढला आहे. या प्राण्यांकडून पिकांचे नुकसान होत आहे. प्राण्यांना हुसकावण्यासाठी ग्रामस्थांना पिकांची राखण करावी लागत असल्याची परिस्थिती आहे.