वडूज : चंदन लाकडांची चोरी व विनापरवाना साठा केल्याप्रकरणी गणेशवाडी, ता. खटाव येथील राजा लक्ष्मण शिंदे व शुभम राजा शिंदे यांच्या राहत्या घरी विनापरवाना चंदन आढळून आले. वडूज पोलिसांनी त्यांना अटक करून त्या दोघांना न्यायालयापुढे उभे केले असता एक दिवसाची पोलीस कोठडी सुनावण्यात आली.
याबाबत पोलिसांकडून मिळालेली माहिती अशी की, सहायक पोलीस निरीक्षक मालोजीराव देशमुख यांना सोमवार दि. ८ रोजी दुपारी अडीचच्या सुमारास राजा शिंदे (वय ६५) व शुभम शिंदे (वय २१)यांच्या घरी चंदनाची लाकडे असल्याची माहिती मिळाली. त्यावरून देशमुख यांनी आपल्या पोलीस कर्मचाऱ्यांसह दुपारी तीनच्या सुमारास छापा टाकला असता, तिथे राहत्या घराच्या आडोशास राजा शिंदे व शुभम शिंदे हे दोघे लाकडे तासत बसलेले दिसले. त्यावेळी ४ किलो ८०० ग्रॅम वजनाचे व १४ हजार किमतीचे चंदन आढळून आले. तर करवत व कुऱ्हाड ही त्याठिकाणी सापडली. सदर घटनास्थळाचा पंचनामा करून दोघांना वडूज पोलिसांनी अटक केली.
विनापरवाना चंदनाची चोरी करून साठा केल्याप्रकरणी गणेशवाडी ता. खटाव येथील राजा शिंदे व शुभम शिंदे या दोघांना वडूज पोलिसांनी अटक केली. त्यांना न्यायालयासमोर हजर केले असता एक दिवसाची पोलीस कोठडी देण्यात आली. पोलीस नाईक राहुल सरतापे तपास करीत आहेत.