फलटण : कोळकी (ता. फलटण) गावाच्या हद्दीतून तीन अज्ञातांनी एकास दमदाटी करीत जबरदस्तीने रोख रक्कम व मोबाइल असा २५ हजार रुपयांचा ऐवज लंपास केल्याची तक्रार फलटण शहर पोलीस स्टेशनला दाखल झाली आहे.
याबाबत फलटण शहर पोलिसांनी दिलेली माहिती अशी, ९ मार्च रोजी सायंकाळी ६.३० वाजण्याच्या सुमारास कोळकी (ता. फलटण) गावाच्या हद्दीत कॅनॉल भराव्यावर अज्ञात तिघे जण नंबर नसलेल्या दुचाकीवरून आले. त्या ठिकाणी माणिक माळवे (वय ३८, रा. मालोजीनगर, कोळकी, ता. फलटण) मोबाइलवर बोलत उभे होते. त्या तीन इसमांनी ‘तू इथे का थांबला आहेस, तू कुठला आहेस,’ शिवीगाळ करून दम देऊन खिशातील १५ हजार रुपये किमतीचा मोबाइल व १० हजार रुपये रोख रक्कम जबरदस्तीने काढून घेतल्याची तक्रार फलटण शहर पोलीस स्टेशनला दाखल झाली आहे. याबाबत सहायक पोलीस निरीक्षक गायकवाड अधिक तपास करीत आहेत.