तरडगाव : फलटण तालुक्यातील तरडगाव येथील बँक ऑफ महाराष्ट्र शाखेचा सायरन बुधवारी रात्रभर वाजतच राहिला. शेवटी गुरुवारी सकाळी सायरन बंद करण्यात आला. वर्षभरापूर्वी एक-दोन वेळा अशा घटना घडल्या आहेत. यामुळे याकडे गांभीर्याने लक्ष द्यावे, अन्यथा एखाद्यावेळी प्रत्यक्षात चोरीची घटना घडून सायरन वाजल्यावर नागरिक त्याकडे दुर्लक्ष करतील.
याबाबतची माहिती अशी की, गावच्या मुख्य बाजारपेठेत मध्यभागी बँक ऑफ महाराष्ट्रची शाखा आहे. बुधवारी रात्री बारा वाजेच्या सुमारास बँकेचा सायरन वाजण्यास सुरुवात झाली. तो रात्रभर तसाच वाजत राहिला. सायरन वाजण्याच्या घटना यापूर्वीही घडल्या आहेत. यामुळे कदाचित नागरिकांनी त्याकडे दुर्लक्ष केले असावे, असे काहींनी सांगितले. गुरुवारी सकाळी साडेसातच्या सुमारास बँक कर्मचाऱ्याने बँकेत येऊन सायरन बंद केला.
चोरीच्या घटना घडू नयेत, यासाठी प्रत्येक बँकांमधून सायरन यंत्र बसविण्यात आलेले असतात. बँक तिजोरीतील रोकड रकमेची जबाबदारी महत्त्वाची असते. त्यानुसार प्रत्येक अधिकाऱ्यांकडून योग्य ती काळजी घेतली जाते. आजवर अनेकदा ठिकठिकाणी विविध बँकेत पाल यासारखा कीटक सेन्सरमध्ये गेल्याने अथवा यंत्रातील बिघाडामुळे विनाकारण सायरन वाजल्याच्या घटनेने अनेकांची भंबेरी उडाल्याचे पाहिले आहे.
तरडगाव येथील बँक परिसरातील विविध गावचे व वाड्या-वस्त्यांवरील नागरिक दैनंदिन व्यवहारासाठी मोठी गर्दी करीत असतात. येथे दररोज मोठी आर्थिक उलाढाल होत असते. यामुळे विनाकारण असे रात्रीचे सायरन वाजण्याचे प्रकार वेळीच थांबले पाहिजेत. नाहीतर एखाद्या वेळी चोरीची मोठी दुर्घटना घडली तरी नागरिक ‘लांडगा आला रे आला...’ या गोष्टीप्रमाणे दुर्लक्ष करतील. यामुळे यावर उपाययोजना करावी, अशी मागणी होत आहे.
चौकट -
नागरिकांना हकनाक त्रास
बुधवारी रात्रभर सायरन वाजत राहिल्याने परिसरातील नागरिक वैतागले होते. अनेकांची झोपमोड झाली. यामुळे सायरन यंत्रात बिघाड आहे का? हे तपासावे. तसेच यापुढे अशा घटना वारंवार होणार नाहीत याची दक्षता बँकेने घ्यावी, अशी अपेक्षा अनेकांनी व्यक्त केली.