खंडाळ्यात सशस्त्र दरोडा

भरवस्तीतील घटना : डोक्याला जबर मार लागल्याने जखमींवर रुग्णालयात उपचार सुरू

खंडाळा : खंडाळा येथे भरवस्तीत मंगळवारी मध्यरात्री चोरट्यांनी एका घरात घुसून तिघांना लोखंडी गजाने मारहाण करून सोन्याचे दागिने व रोख रक्कम असा सुमारे पाच लाखांचा ऐवज चोरून नेला. या मारहाणीत तिघेही गंभीर जखमी झाले असून त्यांना खंडाळा येथील ग्रामीण रुग्णालयात उपचारासाठी दाखल केले आहे. याप्रकरणी अज्ञातांविरोधात जबरी चोरीचा गुन्हा दाखल झाला आहे.याबाबत खंडाळा पोलिसांनी दिलेल्या माहितीनुसार, खंडाळा येथील अजित गजानन खंडागळे यांच्या घरात मंगळवारी (दि. ३) मध्यरात्री सव्वाएकच्या सुमारास तीन अज्ञात चोरट्यांनी दरवाजा तोडून प्रवेश केला. घरातील तिघांनाही लोखंडी गजाने बेदम मारहाण करून चोरट्यांनी कपाटाचे कुलूप तोडून दागिने व रोख रक्कम तसेच गळ्यातील दागिने असा पाच लाख सहा हजार रुपयांचा ऐवज लंपास केला. मारहाण करण्यात आलेल्या तिघांच्या डोक्याला जबर मार लागला आहे. यामध्ये गजानन ताताब्या खंडागळे (वय ७२), विमल गजानन खंडागळे (पय ६५), अजित गजानन खंडागळे (वय ३५) हे तिघे गंभीर जखमी झाले. त्यांचे चुलत बंधू अभिजित खंडागळे यांनी तातडीने त्यांना उपचारासाठी दवाखान्यात दाखल केले.घटनेची माहिती मिळताच पोलिसांनी गावात चोरट्यांचा शोध घेतला मात्र ते हाती लागले नाहीत. या घटनेचा पोलिस निरीक्षक प्रकाश सावंत तपास करीत आहेत. या घटनेमुळे गावात भीतीचे वातावरण निर्माण झाले आहे.पहिली रात्र गस्तीची पोलिस निरीक्षक प्रकाश सावंत यांनी मंगळवारीच खंडाळा पोलिस ठाण्यात पदभार स्वीकारला होता. पहिल्याच दिवशी गावात घडलेल्या दरोड्याच्या घटनेमुळे त्यांच्या पोलिस कर्मचाऱ्यांना रात्रभर गस्त घालावी लागली.