वडूज : स्थानिक स्वराज्य संस्थांच्या या निवडणुकीत एकेक मत महत्त्वाचे असताना निवडणूक आयोगाची डोळेझाक या मतदारांवर मतदानाच्या हक्कावर एकप्रकारे गदा आणत असल्याची वस्तुस्थिती समोर येत आहे. निवडणूक प्रक्रिया व्यवस्थित पार पडावी या राष्ट्रीय व उदात्त हेतूने कार्यरत असलेल्या कर्मचारी मतदारांवर आजअखेर मतदानाचा हक्क बजावण्यासाठी कोणतीच ठोस पावले उचलली नसल्याने त्यांच्या हक्कावर एकप्रकारे अन्यायच केला जात आहे.
खटाव तालुक्यातील ९० ग्रामपंचायतींच्या निवडणुकीत मतदानाचा हक्क बजावण्यासाठी राज्य व राज्याबाहेरील मतदार यांची धडपड सर्वश्रूत आहे. मात्र, या मतदानाच्या हक्कासाठी धडपडणाऱ्या मतदारांवर नेहमीच अन्याय होत आहे. खटाव तालुक्याच्या त्रिभाजनात विखुरलेल्या मतदारांची नेहमीच अवहेलना होत आहे. तालुक्याचे तीन मतदारसंघांत झालेले त्रिभाजन यामुळे मतदानाचा हक्क बजावताना मतदाराला आर्थिक नुकसान होऊन देखील मतदानाचा हक्क बजावता येत नाही. ही बाब लोकशाहीतील फार मोठी खेदजनक घटनाच म्हणावी लागेल. याबाबत वारंवार तक्रारी होऊन देखील निवडणूक आयोगाने याची दखल घेतली नाही, ही बाब लोकशाहीतील सर्वांत मोठी लांच्छनास्पद घटना आहे. तंत्रज्ञानाचा आधार घेत निवडणूक प्रक्रिया सुरळीत पार पाडण्यासाठी निवडणूक आयोगाची योजना वाखाणण्याजोगी असली तरी मतदार मतदानापासून वंचित राहतोय याबाबतची उदासीनता दिसून येत आहे.
चौकट..
तालुक्यात यंत्रणा सज्ज..
खटाव तालुक्यातील ९० ग्रामपंचायतींच्या निवडणुकीत ७७ हजार ४२ पुरुष व ७४ हजार १३५ महिला असे एकूण एक लाख ५१ हजार १७७ मतदार आपला हक्क बजावत आहेत. मतदान अधिकारी १४४८, शिपाई कर्मचारी ३६२ व पोलीस कर्मचारी ३६२ अशी नियुक्ती प्रशासनाकडून केली आहे. परंतु याहीवेळी हे मतदार मतदानापासून वंचित राहणार हे स्पष्ट होत आहे.
--------------