सांगली : येत्या १ मेपासून १८ वर्षांवरील सर्वांना लसीकरण सुरू करण्यात येणार आहे. या पार्श्वभूमीवर प्रशासनाने तयारी सुरू केली असून ॲपवर नोंदणी केलेल्या नागरिकांनाच लस दिली जाणार आहे. लसीकरणासाठी वाढणारी गर्दी लक्षात घेऊन जिल्ह्यात लसीकरण केंद्रांची संख्या १०० ने वाढविण्यात येणार आहे. जिल्ह्यात १८० लसीकरण केंद्रांतून लसीकरणाचे नियोजन आहे.
केंद्र सरकारच्यावतीने १ मेपासून १८ वर्षांवरील सर्वांना लसीकरण करण्यात येणार आहे. त्याचे नियोजन प्रशासकीय करण्यात येणार आहे. केंद्र सरकारकडून मात्र याबाबतच्या मार्गदर्शक सूचना अद्याप तरी आल्या नाहीत. तरीही तयारी करण्यात येत आहे. त्यानुसार जिल्ह्यात उपकेंद्र स्तरावर लसीकरण करण्यात येणार आहे. त्याची संख्या १८० पर्यंत नेण्याचे नियोजन आहे.
१ मेपासून लसीकरण माेहीम राबविताना केवळ आरोग्य विभागाकडून न राबविताना ग्रामपंचायत स्तरावर सरपंच, ग्रामसेवक, तलाठी, ग्रामसुरक्षा समितीचा सहभाग वाढविण्यात येणार आहे. सर्वांत मोठ्या वयोगटाला लसीकरण सुरू करण्यात येणार असल्याने गर्दी होण्याची शक्यता असल्याने सर्वांच्या सहभागाने नियोजन करण्यात येत आहे. जिल्हा परिषदेचे मुख्य कार्यकारी अधिकारी जितेंद्र डुडी यांनी जिल्ह्यातील सर्व सरपंच आणि इतरांशी व्हिडिओ कॉन्फरन्सद्वारे संपर्क साधत सहभागाचे आवाहन केले आहे.
कोविन ॲपवर नोंदणी सुरू होणार आहे. २८ पासून ही नोंदणी सुरू होण्याची शक्यता असलीतरी याबाबत अधिकृत माहिती प्रशासनाकडे नव्हती.
कोट
एक मेपासून जिल्ह्यात लसीकरणासाठी होणारी वाढती गर्दी लक्षात घेता, लसीकरणासाठी केंद्र वाढविण्याचे नियोजन करण्यात येत आहे. वाढविलेल्या केंद्रातून लसीकरण करण्यात येणार आहे.
डॉ. विवेक पाटील, जिल्हा लसीकरण अधिकारी